Galego

Que conmemoramos?/ Abril, Semana do Libro

No ano 1995, a UNESCO acordou declarar o 23 de abril como Día Internacional do Libro e do Dereito de Autor/a.

Sempre se nos conta que a escolla da data obedece á coincidencia da morte de tres escritores universais: William Shakespeare, Miguel de Cervantes e o peruano Gómez Suárez de Figueroa, coñecido como Inca Garcilaso de la Vega. Este dato non é de todo certo. O 23 de abril é a data do enterro de Miguel de Cervantes, non a da súa morte, que se producira o día anterior. Respecto de Shakespeare, é verdade que o autor inglés morreu o 23 de abril, pero do calendario xuliano, vixente no Reino Unido até o século XVIII. A data da súa morte correspóndese co 3 de maio do calendario actual, o gregoriano.

Sexa como for, o certo é que a UNESCO considerou atinado recoñecer e celebrar a riqueza que a lectura e os libros supoñen para a construción dunha sociedade libre e culta. A conmemoración desta data complétase co Premio UNESCO de Literatura Infantil e Xuvenil Pro Tolerancia.

Chus Roxo, Books, (CC-BY-SA)

Actividade 1 Imos ampliar o léxico relacionado cos libros. Anímaste? Escribe a carón de cada definición a palabra correspondente: incunable, manuscrito, plaxio, antoloxía, lombo, epílogo, tipografía, monografía,

Espazos (1):	Estudo detallado sobre un tema concreto, normalmente nun único volume.
Espazos (2):	Colección de obras ou fragmentos seleccionados, escolma.
Espazos (3):	Xeito de imprimir un texto: tipo de letra, espazos etc.
Espazos (4):	Parte externa do libro por onde van unidas as follas.
Espazos (5):	Copia dun libro ou obra, apropiándose fraudulentamente da súa autoría.
Espazos (6):	Obra escrita a man.
Espazos (7):	Obra editada desde a invención da imprenta até inicios do século XVI.
Espazos (8):	Parte final dunha obra que recolle sucesos posteriores aos narrados ou unha reflexión sobre os mesmos.

Habilitar JavaScript

Actividade 2

Da importancia dos libros e da lectura nas nosas vidas dá conta a inmensa cantidade de citas existentes. Procura unha cita coa que te identifiques e preséntalla oralmente aos teus compañeiros e compañeiras. Coméntalles tamén algo sobre o seu autor ou autora.

Comeza lendo as da imaxe a ver que che parecen. E procura algunha máis nos blogs literarios, como este da biblioteca do IES As Lagoas.

Licenciado baixo a Licenza Creative Commons Recoñecemento Compartir igual 4.0

« Anterior | Seguinte »

DE LINGUA EN LINGUA foi realizado por Chus Diéguez Roxo e Yolanda Varela Guzmán durante unha licenza por formación no curso 2017-2018

MONOGRAFÍA	Estudo detallado sobre un tema concreto, normalmente nun único volume.
ANTOLOXÍA	Colección de obras ou fragmentos seleccionados, escolma.
TIPOGRAFÍA	Xeito de imprimir un texto: tipo de letra, espazos etc.
LOMBO	Parte externa do libro por onde van unidas as follas.
PLAXIO	Copia dun libro ou obra, apropiándose fraudulentamente da súa autoría.
MANUSCRITO	Obra escrita a man.
INCUNABLE	Obra editada desde a invención da imprenta até inicios do século XVI.
EPÍLOGO	Parte final dunha obra que recolle sucesos posteriores aos narrados ou unha reflexión sobre os mesmos.