2.2.1 A revolución demográfica

Durante o século XVIII produciuse un aumento da poboación. Explican este incremento o descenso da mortalidade catastrófica, debido á menor incidencia das guerras e sobre todo a unha diminución das epidemias (peste), unido a unha mellor alimentación polo desenvolvemento da agricultura. Mais se este incremento inicial se mantivo foi a causa das transformacións da Revolución Industrial. Deste xeito, as características e as tendencias da poboación mudaron:

• A mortalidade europea, en xeral, e a mortalidade infantil reducíronse.
• A natalidade diminuíu lentamente, aínda que se mantivo alta, o que provocou un forte aumento do crecemento vexetativo da poboación.
• Os movementos migratorios intensificáronse, especialmente co éxodo rural cara ás cidades, mais tamén migracións exteriores, especialmente cara a América.

              A estes cambios contribuíron varios factores:

• Maior dispoñibilidade de alimento e erradicación da fame ao aumentar a produtividade.
• Mellora das condicións de seguridade e de orde pública, polo que diminuíu a bandidaxe, a violencia e os enfrontamentos relixiosos.
• As melloras hixiénicas, sanitarias e médicas (por exemplo, a vacina contra a varíola).
• Mellora dos transportes, primeiro cos camiños e as canles, e logo dos ferrocarrís.

Actividades propostas

S4.  O aumento da demanda é clave na Revolución Industrial: hai máis poboación e ten máis capacidade de mercar produtos. Observe este gráfico, coa evolución da poboación en Inglaterra e Gales nesta época, e responda despois ás preguntas.

Que poboación había no conxunto deses países en 1700, 1801 e 1881? Por canto se multiplicou a poboación entre 1700 e 1881? Tivo algo que ver ese importante crecemento da poboación en 80 anos cos cambios estudados nesta unidade? Razoe a resposta.