Recursos materiais necesarios

Este REA está deseñado para poder ser realizado en formato dixital, inda que pode empregarse indistintamente papel e bolígrafo, polo tanto non é preciso ningún recurso material especial.

Proposta de agrupamentos para actividades grupais

Neste REA propóñense actividades individuais e grupais, considerando as seguintes premisas:

Recoméndase a creación de grupos de 4-5 alumnos/as.

Algunhas das tarefas están especificamente deseñadas como actividades grupais, onde se pretende que o alumnado traballe de forma cooperativa e colaborativa. Con isto queremos:

• Que o alumnado aprenda a coordinarse na realización de tarefas e aumente a súa autonomía persoal.
• Que cada alumno/a asuma un papel colaborativo durante a realización do reto.
• Que os grupos teñan en conta a diversidade de intereses e capacidades.
•  Mellorar e fomentar o respecto entre o alumnado.
• Crear un clima de traballo activo e positivo.
• Valorar o progreso e aconsellar o alumnado nas súas dificultades.

Para isto, aconsellámos ao profesorado que ao utilizar este REA "Expoñendo a Prehistoria" na aula, teña en conta o deseño e planificación de actividades individuais, grupais e multinivel adaptadas á diversidade de intereses e capacidades do alumnado de 1ºESO. Actividades adaptables ás diferentes contornas educativas.

Produtos finais

O produto final consiste na resolución do reto "Organizar e montar unha Exposición" e na promoción e autoavaliación da mesma.

Para conseguilo, o alumnado deberá seguir os seguintes pasos:

1. Investigar os obxectos das caixas. Con nome, data, material, técnica e función.
2. Coñecer e situar as distintas etapas da Prehistoria. Paleolítico, Neolítico, Idade dos Metais.
3. Organizar unha exposición para desfrute de todo o centro. Crear un cartel, montar un vídeo promocional, facer unha guía.
4. Difundir a exposición.

Enfoque multinivel do reto

Pretendemos que un grupo de alumnos e alumnas de 1º ESO da materia de Xeografía e Historia atopen unha relación dos contidos da UD sobre Prehistoria coa súa contorna a través da organización e montaxe dunha exposición.

Durante as diferentes fases do reto o alumnado realizará diferente tipo de actividades, acompañado de contidos agrupados por temática en relación coa Prehistoria, e acompañado de materiais audiovisuais para facilitar a comprensión dos mesmos.

Para a montaxe da exposición os grupos poderán elixir entre as opcións do cartel, o vídeo ou a guía.