Recursos materiais necesarios

Os recursos materiais necesarios para que o alumnado desenvolva con éxito a proposta didáctica son:

• O caderno de aprendizaxe.
• Os materiais do propio REA.
• Un dispositivo electrónico onde poder utilizar aplicacións de ofimática para buscar información.
• Material de papelería (bolígrafos, caderno...)

Entendemos que este material está dispoñible en todos os centros e resulta de fácil manexo por parte do profesorado.

Proposta de agrupamentos para actividades grupais

Dividirase a aula en tres grupos. É importante que o profesorado teña en conta, á hora de designar os grupos, os seguintes aspectos:

• Entre os integrantes haberá estudantes con diferente nivel competencial, de maneira que se eviten desequilibrios entre grupos.
• Dentro do grupo repartiranse con claridade as tarefas, evitando que unha persoa se acabe encargando case en solitario do traballo.
• Na repartición de tarefas terase en conta os diferentes niveis competenciais do alumnado integrante do grupo, de maneira que cada estudante poida desenvolver as súas capacidades.
• O traballo grupal realizarase nun ambiente de coordinación e cooperación. Todos os integrantes deben poder achegar algo, e todos deben ter en conta a opinión dos demais.
• Cada grupo designará unha persoa coordinadora, que se encargará da interlocución co profesor ou profesora.
• Tentarase o equilibrio por sexos, garantindo un ambiente coeducativo e respectuoso e igualitario, evitando os prexuízos e comportamentos sexistas e os sesgos machistas.

Produtos finais

O produto final do REA “Un mundo cheo pero desigualmente repartido” consiste na procura de información que permita ao alumnado, organizado en grupos, estruturar unha serie de datos informativos ofrecidos no propio reto.

Preténdese que os alumnos e alumnas se acheguen dunha maneira totalmente práctica ao coñecemento das características máis relevantes da xeografía da poboación, da xeografía urbana e das desigualdades e a cooperación. que son obxecto de estudo na materia de Xeografía e Historia de 2º de ESO.

Cada grupo presentará aos demais o seu informe explicando as conclusións ás que chegaron durante as súas pescudas. Esta exposición é en si mesma parte avaliable do produto final, en aspectos como a organización do grupo para a presentación, o axuste ao tempo establecido, ou a fluidez e calidade da comunicación.

Finalmente cada un dos grupos deberá valorar o traballo dos seus compañeiros e compañeiras de grupo.

Enfoque multinivel do reto

O deseño do REA está pensado para responder ás distintas necesidades do alumnado, xa que se pode adaptar a distintos ritmos de aprendizaxe.

Na selección de actividades individuais se buscaron diferentes niveis de dificultade, correspondendo ao profesorado seleccionar para cada estudante aquelas que considere idóneas dado seu perfil competencial.

En canto ás actividades grupais, estas están pensadas para que inclúan tarefas de distinto grao de complexidade, de maneira que na sua repartición se poidan adxudicar as de menor dificultade ao alumnado con menor nivel académico. Corresponde tamén ao profesorado guiar aos grupos nesta repartición de tarefas.