A área de Educación Plástica e Visual fundaméntase na adquisición dunha serie de destrezas manuais pero tamén intelectivas mediante unha serie de procesos que contribúan non só á aprendizaxe de "saber facer" senón tamén a "saber ver", fronte á idea de que o obxectivo esencial do noso ámbito é que o alumnado aprenda a debuxar, esta materia desenvolve ante todo unha mirada analítica, crítica e creativa que enriqueza non só a súa sensibilidade cara á arte, senón cara a todo tipo de experiencias cotiás.

O currículo actual incide na necesidade de traballar o sentido estético e analítico ante calquera fenómeno plástico, pero propón incorporar ás dinámicas de traballo asuntos transversais como o coñecemento e posta en valor do patrimonio local, a responsabilidade ecolóxica e social, a innovación e o traballo en equipo. E ante todo, fomentar a innovación e a experimentación como actitudes esenciais nun mundo tan cambiante como o actual. Dado que as nosas ferramentas de traballo cambian e evolucionan constantemente, é crucial manter sempre viva a capacidade de ideación para utilizar a tecnoloxía como aliada para resolver novas problemáticas ou desafíos.

Este REA busca articular esta gama tan ampla de obxectivos establecendo unha secuencia de traballo que empeza pola análise do problema ao que se enfrontan, continúa co estudo de casos similares que poidan servir de inspiración, a aprendizaxe das técnicas que nos poden ser útiles para a resolución do reto, e finalmente a materialización das solucións atopadas.

O pedagogo John Dewey propoñía a experiencia inmediata do alumno como un elemento fundamental para estimular o seu interese e implicación na aprendizaxe, e seguindo ese principio este REA traballa sobre a contorna cotiá do estudante como marco de traballo sobre o que despregar o aprendido. Intégranse así aspectos afectivos, psicomotrices, de conciencia cívica e de aprendizaxe teórica-práctico no que os contidos e obxectivos do currículo orbiten sobre a súa experiencia cotiá.

A situación de aprendizaxe está conectada cos seguintes Obxectivos de Desenvolvemento Sostible (ODS):

ODS 4 - Educación de calidade: busca garantir unha aprendizaxe inclusiva e significativa, promovendo competencias científicas e tecnolóxicas que fortalecen o coñecemento práctico e teórico.

ODS 9 - Industria, innovación e infraestruturas: Inclúe aspectos como as intervencións artísticas a realizar para mellorar espazos deteriorados, fomentando a innovación e as habilidades artísticas.

ODS 17 - Alianzas para acadar os obxectivos: o uso de recursos educativos abertos fomenta a colaboración entre educadores e comunidades para un ensino mellor e accesible.

O marco curricular que abrangue a esta situación de aprendizaxe relacionase directamente coa unidade didáctica número 3: "Técnicas básicas de expresión gráfico-plástica en dúas dimensións, secas e húmidas", e coa número 4: "O volume como experiencia expresiva", que se corresponden coas da programación modelo de 1º de ESO proposta para a área de Educación Plástica e Visual na aplicación PROENS da Consellería de Cultura, Educación, Formación Profesional e Universidades na Comunidade Autónoma de Galicia.

A continuación expóñense os contidos específicos traballados dentro do recurso:

Os obxectivos da materia que se traballan neste REA son os que seguen:

A continuación, inclúense os descritores das competencias clave que marca a normativa vixente e que son traballadas neste recurso.