Este REA (Recurso Educativo Aberto) ten como obxectivo principal que o alumnado adquira e consolide coñecementos do currículo de 2º de ESO de corpos xeométricos a través da posta en valor do patrimonio galego, centrándose na estrutura e función dos faros da costa galega.

Para iso, traballarase o sentido da medida mediante a determinación das dimensións dos diferentes elementos que forman os faros e o cálculo das súas áreas e volumes; o sentido espacial a través da interpretación e representación tridimensional das formas xeométricas presentes nos faros; e o sentido socioafectivo promovendo as vantaxes do traballo en equipo para a resolución de problemas.

Para acadalo, propoñemos que o alumnado, organizado en grupos, leve a cabo o deseño e construción da maqueta dun faro, aplicando os conceptos traballados ao longo do REA. O proxecto deberá integrar:

1. A análise das formas xeométricas presentes nos faros reais.
2. O cálculo das áreas e volumes das distintas partes do faro.
3. A representación gráfica e manipulativa dos corpos xeométricos empregados.

As metas de aprendizaxe son:

1. Recoñecer e clasificar corpos xeométricos e os seus desenvolvementos planos.
2. Construír corpos xeométricos, empregando distintas técnicas e ferramentas dixitais e manuais.
3. Comprender e aplicar as fórmulas para o cálculo de áreas e volumes dos principais corpos xeométricos.
4. Desenvolver habilidades de representación tridimensional e visualización espacial.
5. Utilizar estratexias de resolución de problemas relacionadas con situacións da vida real.
6. Reflexionar sobre o impacto da xeometría na arquitectura, en particular, dos faros.
7. Aprender a traballar en equipo, asumindo roles e responsabilidades para acadar un obxectivo común.
8. Poñer en valor o patrimonio arquitectónico e marítimo galego, recoñecendo a importancia dos faros como elementos históricos e funcionais.