Este REA ten como obxectivo ensinar ao alumnado a crear un noticieiro sobre sucesos positivos que suceden na contorna ou ben a outros niveis xeográficos, a través da busca e tratamento de información e preparación previa e documentación. Deste xeito, promove un enfoque competencial, conectando a aprendizaxe coa súa realidade cotiá, xa que este tipo de contidos forman parte do seu día a día nos fogares.

Os distintos bloques deste REA están deseñados seguindo os principios do DUA, ofrecendo a información en diversos formatos e niveis para garantir a accesibilidade e adaptación ás distintas necesidades do alumnado.

Ademais de coñecer os diferentes formatos e tipos de noticias e textos e adestrar a comprensión, a discriminación e a clasificación da información, este proceso enriquécese cun traballo específico en gramática e ortografía, favorecendo así a mellora da expresión e comprensión escrita.

O obxectivo é proporcionar ao profesorado un recurso innovador e motivador que integre a área de Lingua Castelá e Literatura con contidos da área de Ciencias Sociais e Educación en valores cívicos e éticos. A proposta transversal facilita o traballo conxunto entre estas disciplinas, aproveitando as sinerxías xeradas polas actividades desenvolvidas de forma simultánea.