Personals trainers
"Naturalizando deportes" é un REA (Recurso Educativo Aberto) coa fin de concienciar ao alumnado, e tamén ao entorno próximo do mesmo, da importancia de estar en contacto coa natureza. Nesta situación de aprendizaxe o alumnado terá que traballar en grupo para crear unha xornada deportiva intercentros co obxectivo de motivar ao alumnado doutros centros a realizar actividade deportiva en contacto coa natureza. Entre todos os grupos prepararán actividades ou tarefas nas que se traballen os primeiros auxilios, as actividades deportivas e o medio natural.
Durante o proceso de resolución do reto que se propón no REA, o alumnado aprenderá a dar valor ao contacto co medio natural. Aprenderán a como actuar ante unha urxencia, a realizar actividade deportiva no medio natural e a organizar unha xornada deportiva intercentros.
O REA "Naturalizando deportes" ten como obxectivos principais:
1- Iniciar na práctica de habilidades motrices específicas de deportes colectivos, promovendo a igualdade, a inclusión e o traballo cooperativo, así como a toma de decisións técnicas e tácticas durante o xogo.
2- Fomentar a práctica habitual de xogos deportivos alternativos, como son o ultimate, colpbol, datchball e o kinball, contribuíndo á promoción da axeitada saúde física, mental e social, así como á igualdade e inclusión.
3- Regular e xestionar as emocións durante a práctica deportiva priorizando o desfrute por riba do resultado.
4- Desenvolver habilidades deportivas nos medios natural e urbano, coñecendo as posibilidades que ofrece a vosa contorna.
5- Coñecer os primeiros auxilios básicos e como aplicalos en situacións reais.
Trátase dunha secuencia de aprendizaxe na que se propón, mediante unha contextualización motivadora conectada coa realidade do alumnado, a superación, de forma cooperativa, dun reto ou dunha problemática mentres se traballan os contidos propios da área.
Ao longo da mesma, e de maneira interdisciplinar, expóñense os coñecementos, destrezas, valores e actitudes mediante un enfoque competencial e abordando os mesmos a través de metodoloxías activas.
As situacións de aprendizaxe do proxecto cREAgal estrutúranse en cinco fases:
- A primeira fase está centrada na motivación do alumnado, a identificación da temática e descrición do reto.
- A segunda fase trata de activar os coñecementos previos do alumnado.
- Na seguinte fase, a terceira, lévase a cabo unha conexión entre as aprendizaxes, habilidades e destrezas que xa posúe o alumnado cas novas aprendizaxes.
- Na cuarta fase, o alumnado desenvolverá o reto proposto poñendo en xogo todo o aprendido.
- Por último, a quinta fase, está reservada para a valoración xeral da actividade, a coavaliación de retos, a propia autoavaliación e a recompilación de propostas de mellora.