Solidarízate xogando!
Elaboración propia (proxecto cREAgal) vía Canva.Infografía - Solidarízate xogando! (EDF) (Licenza de contido Canva)
"Solidarízate xogando!" é un REA (Recurso Educativo Aberto) coa fin de introducir aos estudantes na iniciación deportiva, en concreto, nos deportes colectivos. Nesta situación de aprendizaxe o alumnado terá que crear un evento deportivo solidario co obxectivo de axudar a unha asociación da súa vila ou próxima a ela, á vez que practica dous deportes colectivos: o baloncesto e o datchball.
Para iso traballarán nas sesións de Educación Física os xestos técnicos e a táctica de ambos deportes, permitíndolles adquirir coñecementos para poder decidir o deporte do evento deportivo solidario que terán que organizar. Tamén terá un gran protagonismo a investigación sobre as asociacións máis próximas a eles e coñecerá diferentes tipos de eventos, facilitándolles o proceso de creación do seu propio evento deportivo solidario.
O REA "Solidarízate xogando" ten como obxectivos principais:
1- Fomentar a práctica regular de xogos deportivos, tanto populares, como pode ser o baloncesto, e alternativos, como é o datchball, contribuíndo deste modo á promoción da saúde física, mental e social.
2- Iniciar a práctica de habilidades motrices específicas promovendo a toma de decisións tanto técnicas como tácticas durante o xogo.
3- Regular e xestionar as emocións durante a práctica deportiva de competición priorizando o desfrute por riba do resultado.
4- Desenvolver habilidades sociais a través do diálogo, do debate e o respecto ás opinións dos demais, co obxectivo de fomentar a igualdade e inclusión na práctica deportiva.
5- Valorar a práctica deportiva como oportunidade para fomentar a solidariedade, como axente unificador, entre comunidade educativa e contorna social.
6- Vencellar o emprego de ferramentas ou plataformas dixitais á práctica deportiva.
Trátase dunha secuencia de aprendizaxe na que se propón, mediante unha contextualización motivadora conectada coa realidade do alumnado, a superación, de forma cooperativa, dun reto ou dunha problemática mentres se traballan os contidos propios da área.
Ao longo da mesma, e de maneira interdisciplinar, expóñense os coñecementos, destrezas, valores e actitudes mediante un enfoque competencial e abordando os mesmos a través de metodoloxías activas.
As situacións de aprendizaxe do proxecto cREAgal estrutúranse en cinco fases:
- A primeira fase está centrada na motivación do alumnado, a identificación da temática e descrición do reto.
- A segunda fase trata de activar os coñecementos previos do alumnado.
- Na seguinte fase, a terceira, lévase a cabo unha conexión entre as aprendizaxes, habilidades e destrezas que xa posúe o alumnado cas novas aprendizaxes.
- Na cuarta fase, o alumnado desenvolverá o reto proposto poñendo en xogo todo o aprendido.
- Por último, a quinta fase, está reservada para a valoración xeral da actividade, a coavaliación de retos, a propia autoavaliación e a recompilación de propostas de mellora.