A área de Educación Física fundaméntase na adquisición das capacidades que contribúan ao desenvolvemento persoal e a unha mellor calidade de vida. É unha área que se dirixe ao coñecemento progresivo da conduta motora e á adquisición de actitudes, valores e normas referentes ao corpo e ao movemento.

Esta área participa tamén na consecución de diversos fins educativos na Etapa de Educación Primaria: a socialización, a autonomía, aprendizaxes básicas e mellora das posibilidades expresivas, cognitivas, comunicativas e lúdicas. A Educación Física está especialmente indicada para integrar todo tipo de alumnado e resulta idónea cara ao tratamento da diversidade na aula, fomenta a coeducación e promove a igualdade de oportunidades para ámbolos sexos.

Debemos lembrar que a Educación Física non é unha simple aprendizaxe de movementos, senón un camiño cara á educación integral e que utiliza o movemento como axente pedagóxico con diversas funcións: de coñecemento, de organización perceptiva, anatómico-funcional, estético-comunicativa, de relacións persoais, agonística, hixiénica, hedonista, de compensación e catártica.

Este REA contribúe a moitos dos conceptos formulados nos obxectivos principais da área como desenvolver procesos de autoregulación e interacción facendo uso de habilidades sociais e actitudes de cooperación, a adaptación das propias habilidades e capacidades a diferentes situacións, a valorar os medios urbanos como contexto de práctica motriz e fomentando una práctica respectuosa e sustentable, entre outros.

Para abordar con posibilidades de éxito as numerosas situacións motrices ás que se verá exposto o alumnado ao longo da súa vida, será preciso desenvolver, de maneira integral, capacidades de carácter cognitivo e motor, pero tamén afectivo-motivacional, de relacións interpersoais e de inserción social. Deste xeito, o alumnado terá que aprender a xestionar as súas emocións e as súas habilidades sociais en contextos de práctica motriz.

O REA Saltando barreiras está vinculado a varios dos Obxectivos de Desenvolvemento Sostible (ODS), xa que promove valores fundamentais para un mundo máis xusto e sostible. Algúns dos ODS que se relacionan directamente ca proposta son:

• ODS 3: Saúde e benestar → Promove a actividade física, clave para unha vida saudable, fomentando o benestar físico e mental.
• ODS 10: Redución das desigualdades → Promove a inclusión, asegurando que os circuítos motrices sexan accesibles para todas as persoas, independentemente das súas capacidades.
• ODS 11: Cidades e comunidades sostibles → A reflexión sobre as barreiras arquitectónicas conecta directamente co obxectivo de crear espazos urbanos máis accesibles e inclusivos.
• ODS 15: Vida dos ecosistemas terrestres → Fomenta o coidado da contorna natural e urbana, promovendo o uso responsable dos materiais e espazos.

En resumo, a través desta proposta, non só se desenvolven habilidades motrices, senón que tamén se sensibiliza ao alumnado sobre temas como a accesibilidade, a convivencia e a sostibilidade.

O marco curricular que abrangue a esta situación de aprendizaxe relacionase directamente coa unidade didáctica número 5: Brincamos!, que corresponde á programación modelo de 5º de Primaria proposta para a área de Educación Física na aplicación PROENS da Consellería de Cultura, Educación, Formación Profesional e Universidades na Comunidade Autónoma de Galicia.

A continuación expóñense os contidos específicos traballados dentro do recurso:

Obxectivos da materia traballados especificamente no REA:

Competencias clave e os descritores operativos traballados: