A festa do xogo

Este é o REA (Recurso Educativo Aberto) número 3 -dun total de 8- elaborado no marco do proxecto cREAgal para a materia de Educación Física de 5º de Educación Primaria.

A situación de aprendizaxe está contextualizada nunha reflexión crítica sobre o uso intensivo de dispositivos dixitais e o seu impacto na actividade física. O alumnado investigará e practicará xogos tradicionais e populares, deportes autóctonos de Galicia e danzas tradicionais de Galicia e España. Trabállanse habilidades motrices básicas, coordinación rítmica e traballo en equipo, fomentando o respecto pola diversidade cultural e a valorización do xogo e do baile como elementos do patrimonio cultural.

O reto consiste en organizar e celebrar unha festa do xogo tradicional con exhibicións de bailes. Solicitarase ao alumnado a creación de xoguetes sinxelos e a elaboración de diversos produtos para a xornada: cartóns de participación, elementos gráficos de divulgación e información, invitacións etc.