Algoritmos en órbita

Este é o REA (Recurso Educativo Aberto) número 6 elaborado no proxecto cREAgal para a materia de Tecnoloxía e Dixitalización de 2º de Educación Secundaria Obrigatoria.

Ao longo desta situación de aprendizaxe (SA), o alumnado identificará diferentes retos vinculados con situacións no adestramento dun robot para realizar unha misión en Marte, co  fin de programar e deseñar un escenario de exploración con micro:bit e/o mBot2 que dea solución a diferentes retos ou problemas. Por exemplo, un robot que detecte o ruído asociado a unha tormenta e alerte por radio ou wifi a outro robot receptor.

O proceso incluirá o uso de contornas de programación visual por bloques como MakeCode (para micro:bit) e mBlock (para mBot2), promovendo a comprensión de estruturas básicas de programación (bucles, condicionais, sensores, actuadores...). Ademais, guiarase ao alumnado na resolución colaborativa de problemas, o traballo en equipo e a avaliación crítica do impacto social e ambiental do uso da robótica.