Tipo de valor usado en programación ou electrónica dixital, que ten só dous posibles valores, verdadeiro ou falso. Toma o nome do creador das operacións lóxicas, George Boole.
Exemplo:
As operacións lóxicas que usan valores booleanos son "OU", "E" e "NON".
Cadea
Definición:
En programación, unha cadea é calquera conxunto de caracteres que podan gardarse coma un dato. Cada un dos elementos da cadea (letras, símbolos...) é coma un elo (eslabón en castelán) da cadea que ten unha posición de orde.
Exemplo:
A cadea "OLA MUNDO" ten 9 elementos e dise que ten unha lonxitude igual a 9.
Os datos
Xa utilizaches as controladora Adafruit PCE e/ou micro:bit para resolver pequenos desafíos. Fixeches que as placas reaccionasen á luz, ao son, á temperatura ou á presión dun botón. En todos eses casos estabas traballando con algo fundamental na programación: a información do exterior. Nos programas que fixeches, a placa actuaba en función do que lle chegaba do exterior, é dicir, en función dos datos recibidos.
Os datos poden ser:
Datos numéricos
Cando les a temperatura, o nivel de ruído ou a intensidade da luz estás obtendo números. Eses números indican unha cantidade e permítenche comparar valores, poñer límites e facer que o programa reaccione dun xeito ou doutro.
A temperatura
25 graos Celsius
A intensidade da luz
200 lumens
O nivel de ruído
70 decibeis
Datos lóxicos
Cando comprobas se un botón está premido ou non, estás a recibir un tipo de dato diferente: unha resposta que só pode ter dúas opcións posibles (si ou non). A este tipo de datos chámaselles datos lóxicos (ou booleanos), porque representan valores de verdadeiro ou falso e úsanse moito para tomar decisións dentro do programa.
Marcar si ou non
Está aceso ou está apagado
Datos de texto
Ás veces tamén traballas con palabras e frases, é dicir, con datos de texto (chamadas cadeas de texto en programación). Por exemplo, en contornas como Scratch podes facer unha pregunta e gardar a resposta para usala despois no programa.
Como te chamas?
Datos estruturados
Que non te asuste o nome. Os datos estruturados son simplemente conxuntos de datos organizados. A diferenza dun dato simple, aquí gardamos varios datos xuntos e a súa orde é importante.
En programación hai distintos tipos de datos estruturados, pero vas empregar as listas. Nunha lista os datos están colocados nunha orde concreta, e esa posición ten significado. Por exemplo, nun campionato deportivo non é o mesmo quedar primeiro que terceiro. As listas permítenche gardar esa información mantendo a orde correcta.
Patricia, Manuel, Sara, Ánxela...
Lectura facilitada
A controladora recibe información do exterior.
Esa información son os datos.
Os datos poden ser de varios tipos.
Datos numéricos
Os datos numéricos son números.
Por exemplo: graos de temperatura, lumes de luz ou decibeis de ruído.
Estes datos serven para comparar valores.
Datos lóxicos
Os datos lóxicos só teñen dúas opcións.
Poden ser si ou non.
Tamén poden ser verdadeiro ou falso.
Estes datos serven para tomar decisións.
Datos de texto
Os datos de texto son palabras ou frases.
En programación tamén se chaman cadeas de texto.
Datos estruturados
Os datos estruturados son varios datos xuntos.
Nestes datos, a orde é importante.
Este ano usarás listas.
Audio
Datos que cambian: as variables
Un programa non pode manexar información se previamente non a garda nalgún lugar. Para poder utilizar, comparar ou modificar os datos ao longo da execución, necesita un espazo onde almacenalos. Ese espazo chámase variable.
Unha variable é, en esencia, un lugar con nome onde se garda un dato. Podes imaxinala como unha caixa etiquetada. Dentro desa caixa gardas un valor, e ese valor pode cambiar mentres o programa está en funcionamento. Se a temperatura aumenta, cambia o número gardado. Se se preme un botón, cambia o valor lóxico que indica o seu estado. Se o usuario escribe outra resposta, cambia o texto almacenado.
A continuación, verás como empregar estas variables na linguaxe de programación de MicroBlocks.
