No seguinte vídeo podemos comprobar como se produce a resonancia. Este experimento é moi sinxelo e animámoste a facelo, xa que os materiais  necesarios poden atoparse en calquera casa.

EXPLICACIÓN

As ondas sonoras, cando se propagan, poden atopar obstáculos durante a súa traxectoria que alteran tanto a dirección como a velocidade. O eco, a reverberación e a resonancia son efectos acústicos provocados por este motivo. Vexamos en que consiste cada un. 

O eco é o rebote do son contra unha superficie dura. A onda sonora reflíctese, cambia de dirección, e volve ao seu emisor, propagándose en dirección contraria á inicial. Para que se produza o eco e o noso oído o poida percibir, é necesario que haxa bastante distancia. No caso de que existan varios obstáculos crearase un eco múltiple. O noso oído percibe o eco despois do son orixinal.

A reverberación é un fenómeno acústico que se produce cando as ondas chocan contra as paredes, o teito e o chan dun recinto, producindo varias reflexións á vez.  As distancias son máis curtas en comparación co eco, de xeito que o rebote das ondas chega ata os nosos oídos antes de que se extinga o son.

A resonancia  é un efecto acústico que  se produce cando un corpo vibra pola influencia doutro corpo. No noso experimento, as vibracións xeradas ao fretar o bordo da copa propáganse facendo vibrar a copa baleira que está ao seu carón, e, consecuentemente, facendo vibrar tamén os grans de pementa.