No seguinte experimento imos reproducir un fenómeno natural como é a néboa no interior dun vaso. Presta atención!

EXPLICACIÓN

Como comentamos anteriormente,  a auga é un elemento único, entre outras características, podemos apreciala no medio natural nos tres estados: sólido, líquido e gasoso. Así, podemos ver a auga en estado líquido nos mares, océanos, ríos, lagos, fontes, así como nas augas subterráneas. A auga en estado sólido podemos observala en forma de neve, nos cumios das montañas, nos casquetes polares ou na sarabia, en forma de xeo. E sabemos que o vapor de auga está presente no aire, aínda que non o vexamos. 

Ás veces, percibimos na paisaxe que o aire non é transparente como de costume, e apreciamos a presenza dunha capa branquecina que nos impide mirar ao lonxe e incluso non nos permite ver os obxectos máis próximos coa mesma nitidez que adoitamos. Esa capa branquecina é a néboa. O vapor de auga que está presente no aire e non apreciamos normalmente, ás veces, cando entra en contacto cunha corrente de aire frío, condénsase formando esa masa de pingas diminutas de auga coma se fose unha nube baixa. 

A formación da néboa depende das condicións meteorolóxicas, sendo máis frecuentes en determinados períodos do ano, coma no outono, e en determinados momentos do día, especialmente pola noite. A medida que o sol quenta esa masa de auga, a néboa desaparece.

No experimento, o vapor de auga procedente da auga quente que contén o vaso, ao entrar en contacto co aire que arrefrían os xeos, condénsase, quedando esas pingas diminutas de auga entre a auga quente e o coador, no interior do vaso.