No seguinte vídeo explicamos como construír un circuíto eléctrico básico. Lembra que se decides facer un ti mesmo, debes contar coa axuda dunha persoa adulta.

EXPLICACIÓN

A electricidade é un tipo de enerxía moi usado na vida cotiá, por exemplo, dos electrodomésticos que temos nas nosas casas e utilizamos a diario, a maioría funciona con enerxía eléctrica.

Pero, que é a electricidade? A electricidade é unha forma de enerxía que consiste na circulación de cargas eléctricas presentes nos corpos.  A carga eléctrica é unha propiedade da materia; esta carga orixínase  nos átomos, concretamente, nas partículas subatómicas: nos electróns (carga negativa) e nos protóns (carga positiva). A electricidade maniféstase a través de forzas de atracción ou de repulsión: dous corpos con diferente carga atráense; polo contrario, dous corpos co mesmo tipo de carga repélense. A maior parte dos obxectos que nos rodean teñen a mesma carga negativa e positiva, iso significa que son electricamente neutros.

En función de se un material transmite con maior ou menor facilidade a corrente eléctrica falamos de materiais condutores ou illantes. Un material é condutor eléctrico cando transmite a corrente eléctrica a través del; os materiais que mellor conducen a corrente son os metais. Pola contra, un material é un illante eléctrico cando non permite o paso de corrente a través del; é o caso da madeira ou do plástico.

Segundo sexa o transporte da corrente eléctrica, distinguimos dous tipos de corrente:

1. Corrente continua: a corrente circula sempre na mesma dirección e coa mesma intensidade. É a corrente que xeran as pilas, as baterías ou as dínamos. O noso circuíto é de corrente continua.

2. Corrente alterna: varía a dirección e tamén  a intensidade. É a corrente que usamos habitualmente nas nosas casas, nos enchufes e nas tomas de corrente.

No circuíto eléctrico que construímos partimos dunha pila, que é o xerador, e a través do cable, que é o material condutor grazas ao fío de cobre do seu interior, chegamos á lámpada, que é o corpo receptor. O interruptor permítenos pechar e abrir o circuíto: cando presionamos o interruptor pechamos o circuíto, permitindo que a electricidade flúa por el; cando o interruptor non está presionado, o circuíto permanece aberto, impedindo a circulación da electricidade polo circuíto. 

A electricidade é un tipo de enerxía facilmente transformable en diferentes efectos moi interesantes para o ser humano: efectos mecánicos, luminosos, caloríficos, magnéticos ou químicos.