Método Takedinorum

para a aprendizaxe da Percusión Corporal

O profesor poderá empregar os vídeos:
- de modo directo nas súas sesións lectivas, co alumnado desenvolvendo os exercicios que se propoñen.
- coma unha aprendizaxe propia para despois desenvolver as súas propias sesións Takedinorum na aula, copiando elementos ou creando os seus propios.
O profesor poderá desenvolver un traballo:
- rápido e superficial, intercalando os vídeos en medio das súas sesións de aula, como un modo de cambiar de actividade e manter a atención. Este tipo de traballo é moi importante e motivador en ocasións, non emprego "rápido e superficial" de maneira pexorativa senón en contraposición cun traballo máis profundo sobre os contidos do vídeo.
- máis en profundidade, asegurándose de que a maior parte do alumnado desenvolva os contidos, empregando os materiais complementarios...

Os recursos poderán ser empregados en calquer curso de ESO e Bacharelato, dependerá do desenvolvemento curricular que se decida en cada curso e das características do alumnado.

Os vídeos están organizados en 5 niveis de aprendizaxe. Como orientación xeral, se se quere traballar dun xeito progresivo:
- os niveis 1 e 2 poderían funcionar ben en 1ºESO (Obradoiro de música), 2º e 3º ESO (música),
- os niveis 3, 4 e 5 en 4º ESO e Bacharelato.
- Por exemplo, podemos utilizar os contidos de percusión corporal dos vídeos como unha ferramenta para reforzar o traballo dunha partitura en calquer nivel, ou para traballar unha cuestión rítmica concreta.

Cada vídeo vai acompañado duns comentarios con suxerencias e propostas que poden ser útis para o profesor para o traballo na aula.

Ademáis pódense descargar as partituras completas dos ritmos traballados en cada vídeo, que poden servir tanto para o estudo e preparación do profesor como para o traballo do alumnado.

Na guía didáctica inclúense ademáis algunhas consideracións sobre a avaliación dos procesos desenvolvidos a través destes recursos.