Este REA (Recurso Educativo Aberto) correspóndese coas unidades 3 e 4 da área de Educación en Valores Cívicos e Éticos da programación de Proens. É un recurso globalizado, que abrangue distintas áreas, dun xeito transversal. 

O fío condutor é a creación dun museo. Co desenvolvemento dos retos, configuraremos as obras que darán forma a este espazo, con tres salas definidas (unha para cada reto). 

A través deste REA definirase a sala 2 do museo: a creación dunha instalación artística que reflicta os coñecementos adquiridos ao longo do proxecto.

Esta proposta ten como fin mellorar o desenvolvemento global do alumnado, estimulando a expresividade, a sensibilidade social e as capacidades comunicativas. Preténdese favorecer a educación emocional como punto clave na xestión de aprendizaxes. Así como a corresponsabilidade entre todas as persoas sen exclusión de xénero, identidade, etnia ou procedencia, respectando a diversidade e incidindo en conceptos como a convivencia democrática, a xustiza e a paz.

Neste sentido, o REA está vencellado coa unidade 2 "Animación" da área de Educación Plástica e Visual. E coa unidade 5 "A vida política e social" de Ciencias Sociais. Porén, é preciso indicar que se traballan intrinsecamente aspectos da área de Lingua Galega e Literatura. 

Os bloques de autocoñecemento e autonomía persoal, sociedade, xustiza e democracia e desenvolvemento sostible e ética ambiental, pretenden facer un percorrido dende a propia persoa ata a súa autonomía, analizando o papel que cada individuo ten na sociedade e a súa responsabilidade para cos e coas demais.

A través da consecución do reto, promóvense as seguintes metas de aprendizaxe:

• Promover e amosar un xeito de convivencia democrática, xusta e inclusiva.
• Definir con claridade os conceptos de democracia, xustiza e paz.
• Interactuar co grupo de forma autónoma, adoptando condutas cívicas e éticas.
• Valorar a arte como expresión de sentimentos e enriquecemento cultural.
• Respectar as intervencións dos demais, valorándoas e recollendo ideas que enriquezan as achegas propias.
• Entender os dereitos humanos como base para unha convivencia empática.
• Valorar o respecto cara á diversidade en todas as súas formas.