EmbalArte
“EmbalArte" é un REA (Recurso Educativo Aberto) coa fin de fomentar nos estudantes habilidades e capacidades, tanto cognitivas como emocionais, expresando pensamentos e emocións de forma libre e orixinal, estimulando a creatividade e descubrindo a linguaxe xeométrica a través dun reto estimulante. Nesta situación de aprendizaxe o alumnado terá que traballar en grupo para realizar unha chuvia de ideas, na investigación e preparación de materiais, e nas reflexións críticas finais sobre os resultados do seu traballo. Traballarán de forma colaborativa para decidir a forma e o deseño da embalaxe dun obxecto ou produto local, tendo en conta as necesidades de comunicación, uso, protección e transporte dese produto, sempre dende unha perspectiva de respecto ao medio ambiente. Investigarán e estudarán o obxecto, planificarán o deseño da embalaxe, tendo en conta a escala, forma, materiais e, finalmente, farán unha avaliación e reflexión.
O REA "EmbalArte" ten como obxectivos principais (hai que cambialos):
1. Fomentar a capacidade do alumnado para xerar ideas, deseñar obxectos e identificar o valor do deseño na vida cotiá.
2. Coñecer e experimentar coa linguaxe da xeometría, identificando trazados, figuras xeométricas e formas de representación no espazo, aplicándoo nun deseño útil.
3. Fomentar o traballo colaborativo mediante o intercambio de ideas a través de diferentes deseños baseados na xeometría.
4. Desenvolver unha ollada proactiva e crítica sobre o deseño, entendendo as aplicacións da xeometría na vida cotiá.
5. Potenciar o sentido espacial e a percepción dunha necesidade práctica de forma creativa.
Trátase dunha secuencia de aprendizaxe na que se propón, mediante unha contextualización motivadora conectada coa realidade do alumnado, a superación, de forma cooperativa, dun reto ou dunha problemática mentres se traballan os contidos propios da área.
Ao longo da mesma, e de maneira interdisciplinar, expóñense os coñecementos, destrezas, valores e actitudes mediante un enfoque competencial e abordando os mesmos a través de metodoloxías activas.
As situacións de aprendizaxe do proxecto cREAgal estrutúranse en cinco fases:
- A primeira fase está centrada na motivación do alumnado, a identificación da temática e descrición do reto.
- A segunda fase trata de activar os coñecementos previos do alumnado.
- Na seguinte fase, a terceira, lévase a cabo unha conexión entre as aprendizaxes, habilidades e destrezas que xa posúe o alumnado cas novas aprendizaxes.
- Na cuarta fase, o alumnado desenvolverá o reto proposto poñendo en xogo todo o aprendido.
- Por último, a quinta fase, está reservada para a valoración xeral da actividade, a coavaliación de retos, a propia autoavaliación e a recompilación de propostas de mellora.