Como podes ver na imaxe, a árbore xenealóxica de Filipe é bastante complexa, froito das alianzas e políticas matrimoniais das distintas casas reinantes europeas.

Os lazos familiares entre Filipe V (Filipe de Anjou) e Carlos II de España procedían da dinastía dos Austrias.

Carlos II era fillo de Filipe IV de España. Pola súa parte, Filipe de Anjou era bisneto tamén de Filipe IV, xa que a súa avoa, María Teresa de Austria, era filla deste rei e irmá de Carlos II. María Teresa casara con Luís XIV de Francia, e do seu matrimonio naceu o Gran Delfín de Francia, pai de Filipe de Anjou. Todo un xogo de tronos! 

Deste xeito, Filipe de Anjou era sobriño-neto de Carlos II (é dicir, neto da súa irmá). Este parentesco directo dentro da mesma familia real explicaba os seus dereitos dinásticos ao trono español cando Carlos II morreu sen descendencia en 1700.

Unha vez consolidado no poder, Filipe, como membro dunha dinastía francesa centralizada, impulsou unha profunda reforma do Estado. Segundo o modelo francés, instaurado polo seu avó Luís XIV,  implantou un modelo centralista, que pretendía reforzar a autoridade real e unificar o funcionamento da administración. O obxectivo era eliminar a diversidade de leis, institucións e privilexios que existían nos distintos reinos da Monarquía Hispánica desde a época dos Austrias, un xeito de goberno baseado nos diferentes reinos peninsulares, baixo a soberanía dun único rei, que gobernaba estes territorios cun espírito pactista e negociador.