Organizando o reto

Equipos e temas.

1. Coa axuda da vosa profesora ou profesor formaredes grupos de 3 ou 4 membros.
2. Cada grupo deberá traballar un tema:
   1. O tema será repartido ao chou entre os distintos grupos.
   2. Non se poderán repetir os temas.
   3. O medio de comunicación debe reflectir distintas sensibilidades, tendencias políticas ou ámbitos da vida. Aquí tedes algunhas propostas: de tendencia absolutista; de tendencia liberal; do partido Xirondino; do partido Xacobino; das 13 colonias británicas en América; Arte e Cultura do século XVIII.
3. Repartiredes o traballo entre os membros do grupo. Lembrade que nos medios de comunicación hai: redactores, investigadores, fotógrafos, ilustradores, presentadores,... todas as tarefas son importantes e a colaboración de todos fundamental!
4. Elaboraredes un guión previo para o voso traballo. Non vos esquezades de ensinarllo á vosa profesora ou profesor para corrixir os posibles erros!

Un xornal en papel ou dixital.

Os quioscos das nosas cidades e vilas énchense de xornais diarios, revistas semanais, publicacións mensuais ou anuais, etc, que ofrecen noticias con datos obxectivos, mais cunha liña editorial que reflicte a ideoloxía dos seus directivos. 

Buscade algún xornal en papel e dixital e observade a súa estrutura. Veredes que son diferentes e teñen distintas seccións: Portada, Contraportada, Mundo, Nacional, Local, Cultura, Opinión, Necrolóxicas, Entretemento, Anuncios,... Escollede as que queredes que formen parte do voso traballo.

Para elaborar os artigos do periódico, debedes ter en conta que sempre ten un titular, subtitular, corpo e pode levar foto ou fotos (pé de foto). O tamaño da letra e a letra negra axudan a diferenciar cada unha das súas partes, destacando a súa importancia.

Un xornal, que se prece, debe ter un nome rechamante. Non esquezades escribir en columnas e adaptar os artigos a estes espazos.

Respectar a vosa liña editorial é fundamental, así como identificar o Equipo de Redacción: quen é o director, o editor, o redactor, os colaboradores, os fotógrafos,...

Para o voso periódico dixital podedes empregar o programa GooDocs, con diversos deseños para elaborar un xornal.

Tamén podedes empregar modelos para Libre Office.

Mirade estes periódicos da época! Daranvos unha pista de como facer o voso traballo!

Non esquezades difundir o voso traballo! Non esquezades incluír que é unha edición non venal!

Un programa de radio.

Cando ides no coche coas vosas familias, seguro que tedes escoitado a radio para facer a viaxe máis entretida. En xeral, preferimos a música, mais en ocasións quedamos pendentes dalgún programa que nos fala da actualidade, das novas locais, provinciais, autonómicas ou nacionais. Pode ser un programa de últimas noticias, de actualidade, de debate, etc.

Os aspectos que debedes ter en conta para elaborar o voso programa de radio son:

1. Familiarizarvos con este medio de comunicación, escoitade distintas cadeas de radio. Ao igual que os periódicos, teñen distintas liñas editoriais, en función das ideas dos seus propietarios, aínda que non sexan rigorosos coas noticias.
2. Escollede un nome para o voso programa de radio.
3. Investigade sobre os distintos tipos de programa e escollede un para o voso tema.
4. Elixide temas para o voso programa (o traballado neste REA será de moita axuda).
5. Creade un guión e os contidos das vosas noticias. Non esquezades escoller música e publicidade para intercalar entre as vosas noticias.
6. Non esquezades repartir as tarefas do voso equipo: presentador, produtor, operador, etc.
7. Gravade o voso programa, cunha voz nidia e radiofónica.
8. Emitídeo pola radio do voso centro. Sorte na emisión!

Ou un pódcast.

Non debemos confundir un pódcast cun programa de radio. Mentres o primeiro está pregravado, audible en calquera momento, a radio é un medio vivo, cuxos programas emítense nun horario fixo e cun alcance xeográfico determinado.

Para a elaboración dun pódcast debedes:

1. Contar cun espazo de gravación. Os equipos de radio dos vosos centros poden ser lugares axeitados.
2. Ter algo que contar. Que vos parece algún revolucionario ou algunha revolución?
3. Creade un texto que sexa impactante aos oídos dos vosos potenciais oíntes.
4. Buscade pódcast de historia na rede, non para copialos, senón para darvos unha idea do que podedes facer.
5. Formulade os vosos obxectivos.
6. Elixide o tema e a vosa idea.
7. Precisades un formato de pódcast: entrevistas, monólogos, conversacións de grupo ou narracións documentais. A duración do mesmo pode rondar os 5 minutos.
8. Creade unha identidade propia para o voso pódcast: voz, música...
9. A gravar o voso pódcast e a compartilo.

Existen diversos programas de uso libre. Un dos máis usados é Audacity. 

Pois, mans á obra. Dar a coñecer os revolucionarios e os seus logros está ao alcance da vosa voz. Atrevédesvos?