Neste novo recurso vas afondar nos cambios políticos e económicos que revolucionaron o mundo a partir do século XVIII, orixinando unha nova era histórica da que nós somos herdeiros.

É a Idade Contemporánea, un período moi convulso, no que a burguesía e o proletariado, unha nova clase social, van loitar polas súas liberdades, pola igualdade e a solidariedade entre cidadáns. 

Moitos destes revolucionarios e revolucionarias eran homes e mulleres con "moitas luces", persoas con capacidade de razoar e entender, por iso este período foi coñecido como o "Século das luces", no que triunfaron a razón, a educación e o coñecemento científico. Unha luz para loitar contra a superstición e a ignorancia do Antigo Réxime.

Vas achegarte, entón, a unha etapa caracterizada por revolucións industriais (con profundos cambios nos sistemas de produción) e revolucións políticas (liberais e burguesas, que favorecen a instauración de estados nacionais democráticos e constitucionais).

Aínda que as fontes históricas destacan a líderes individuais, é importante lembrar que os movementos revolucionarios dependen do motor popular e da conciencia política, de homes e mulleres que, nunha acción colectiva, loitan por transformar e mellorar as súas condicións de vida.

Para poñerte en marcha, aquí tes un pequeno vídeo que che servirá como introdución a este período convulso. Unha sociedade moi desigual, que loitará por reducir as diferenzas.