Saltar navegación

1.1. Ofertas de emprego

Búscanse profesionais da comunicación

Portada dun xornal con novas revolucionarias

Neste recurso enfrontaraste a un reto que combina historia, medios de comunicación e unha viaxe no tempo ata un momento cheo de cambios, conflitos e novas ideas.

Mais… como se viviron realmente estes feitos? Quen os contou? Que noticias chegaron á xente nun mundo que buscaba afastarse do Antigo Réxime, para avanzar cara a unha sociedade con maior “liberdade, igualdade e fraternidade”?

Converteraste en reporteiro ou reporteira e, en pequeno grupo, crearás un xornal (en papel, dixital, radio ou pódcast) sobre os principais acontecementos deste período revolucionario na segunda metade do século XVIII.

Cada grupo traballará cunha liña editorial concreta, é dicir, contará as noticias desde un punto de vista determinado. Por exemplo: absolutista, liberal... na Revolución Francesa; reformista ou tradicional na España borbónica; colonos ou británicos na independencia americana; ou diferentes visións na Revolución Industrial: patróns, proletariado...

Entre toda a clase intentaredes cubrir distintos territorios e diferentes puntos de vista, para comprender que a historia non se viviu igual para todas as persoas.

A través das túas noticias, explicarás como estas revolucións transformaron o mundo e a vida das persoas.

Lectura facilitada

Neste recurso terás un reto.
Este reto combina historia, medios de comunicación e unha viaxe no tempo.

Viaxarás a unha época con moitos cambios, conflitos e novas ideas.

Pero… como se viviron estes feitos?
Quen os contou?
Que noticias chegaron á xente?

Neste tempo, moitas persoas querían cambiar o mundo.
Querían afastarse do Antigo Réxime.
Buscaban máis liberdade, igualdade e fraternidade.

Vas converterte en reporteiro ou reporteira.
Traballarás en pequeno grupo.

Crearás un xornal.
Pode ser en papel, dixital, radio ou pódcast.

Cada grupo terá un punto de vista diferente.
É dicir, contarás as noticias desde unha posición concreta.

Por exemplo:
- Na Revolución Francesa: absolutista, liberal...
- En España: reformista ou tradicional
- En América: colonos ou británicos
- Na Revolución Industrial: patróns ou proletariado

Entre toda a clase cubriredes distintos lugares e puntos de vista.
Así entenderás que a historia non foi igual para todas as persoas.

Co teu xornal, explicarás como estas revolucións cambiaron o mundo
e a vida das persoas.

Despois do reto serás quen de…

  • Pictograma que representa unha persoa chegando a metaBuscar, seleccionar e organizar información fiable sobre as revolucións burguesas, a Revolución Industrial e a crise do Antigo Réxime en España e Galicia.
  • Comprender os cambios políticos, sociais e económicos que levaron da sociedade estamental á sociedade de clases.
  • Analizar fontes históricas (textos, imaxes, gráficos ou mapas) e interpretar diferentes puntos de vista sobre o pasado.
  • Utilizar vocabulario histórico adecuado para explicar feitos como o reformismo borbónico, a industrialización ou o nacemento do liberalismo.
  • Elaborar un xornal histórico con información clara, organizada e creativa, empregando ferramentas dixitais.
  • Reflexionar sobre a importancia dos dereitos, da igualdade e da diversidade nas sociedades actuais a partir do estudo do pasado.
  • Valorar o patrimonio histórico e cultural como parte da nosa identidade e como recurso para comprender o mundo actual.

Lectura facilitada

  • Buscar e organizar información sobre as revolucións e a Revolución Industrial.
  • Comprender o paso da sociedade estamental á sociedade de clases.
  • Analizar textos, imaxes, gráficos e mapas históricos.
  • Empregar vocabulario histórico adecuado.
  • Elaborar un xornal histórico con ferramentas dixitais.
  • Reflexionar sobre os dereitos, a igualdade e a diversidade.
  • Valorar o patrimonio histórico e cultural.

Entrevista de traballo: cubre o diario de aprendizaxe

Imaxe do diario de aprendizaxe no proxecto cREAgal. Amosa un lapis e un caderno co logotipo do proxecto na tapa

Definitivamente, o traballo é teu. Formas parte da redacción do xornal!

Antes de comezar a ser unha intrépida ou un intrépido reporteiro, vai ao teu diario de aprendizaxe e reflexiona sobre as seguintes cuestións:

  1. Consultas a prensa a diario ou ves os telexornais? Que tipo de noticias che chaman máis a atención?
  2. Pensas que estás a vivir unha época histórica importante? Por que? Que feitos actuais cres que aparecerán nos libros de historia?
  3. Cres que as noticias son sempre obxectivas ou poden estar influídas por quen as escribe?
  4. Se foses xornalista no século XVIII, que acontecementos che gustaría contar? Por que?

Lectura facilitada

Definitivamente, o traballo é teu.
Formas parte da redacción do xornal!

Antes de comezar a traballar como unha intrépida ou un intrépido reporteiro, vai ao teu diario de aprendizaxe e reflexiona sobre estas cuestións:

  1. Consultas a prensa a diario ou ves os telexornais?
    Que tipo de noticias che chaman máis a atención?
  2. Pensas que estás a vivir unha época histórica importante?
    Por que?
    Que feitos actuais cres que aparecerán nos libros de historia?
  3. Cres que as noticias son sempre obxectivas?
    Ou as noticias poden estar influídas por quen as escribe?
  4. Se foses xornalista no século XVIII (dezaoito),
    que acontecementos che gustaría contar?
    Por que?

Feito con eXeLearning (Nova xanela)