Todas as persoas suman: construíndo un mundo diverso
3.3. Cando a poboación cambia, a paisaxe muda
Glosario
Avellentamento
Definición:
Nunha poboación, aumento do número de persoas maiores en relación coas novas xeracións. Tamén se pode empregar envellecemento.
Exemplo:
Debido ao avellentamento da poboación, cada vez son necesarios máis servizos sanitarios.
Despoboamento
Definición:
Redución da poboación dun lugar, especialmente no rural, cando a xente se vai vivir ás cidades ou a outros territorios.
Exemplo:
Moitas aldeas galegas sofren despoboamento porque a xente nova vai vivir ás cidades.
A poboación como espello da sociedade
Vivimos nun mundo en constante cambio. As persoas movémonos, traballamos, creamos espazos e transformamos o territorio, deixando nel a nosa pegada. Pero… por que algunhas zonas medran mentres outras se baleiran? Que consecuencias ten que cada vez haxa máis persoas maiores e menos nacementos?
En Galicia e en España vivimos un importante cambio demográfico e social: a poboación envellece, o rural perde habitantes e, ao mesmo tempo, chegan persoas doutras partes do mundo que enriquecen a nosa cultura e contribúen ao desenvolvemento económico.
Neste apartado aprenderás a interpretar como e por que cambia a poboación, a comprender os efectos do avellentamento, do despoboamento e a reflexionar sobre como construír unha sociedade máis equilibrada, inclusiva e sostible.
Lectura facilitada
O mundo cambia todo o tempo. As persoas móvense, traballan e cambian o territorio.
Hai zonas que medran. Hai zonas que se baleiran. Hoxe hai máis persoas maiores e hai menos nacementos.
En Galicia e en España a poboación está a cambiar. O rural perde xente. As cidades teñen máis habitantes. Tamén chega xente doutros países. Esta xente trae novas culturas e axuda á economía.
Neste apartado aprenderás como cambia a poboación. Tamén entenderás os efectos do envellecemento e do despoboamento. Pensarás en como facer unha sociedade máis equilibrada e sostible.
