A profesora formulounos unha serie de preguntas sobre aspectos económicos, políticos e sociais de Galicia, de España e de Europa, pero non soubemos moi ben que responder, o que fixo que nos expuxera outra cuestión para reflexionar: se as persoas que naceron no continente europeo descoñecen as súas principais características, como se poden sentir as que emigran doutras partes do mundo para tentar empezar unha nova vida nese territorio? Iso levou a que saísen palabras como interculturalidade, inclusión, diversidade…Logo, leu unha serie de noticias relacionadas coas persoas inmigrantes e as súas razóns para marchar do seu país, o que xerou un forte debate na clase, a favor e en contra do fenómeno migratorio. 

Despois, lembrounos que as principais causas da emigración son por cuestións laborais e que o pobo galego foi e é emigrante, polo que deberiamos telo en conta á hora de valorar o papel positivo que a emigración xoga no desenvolvemento económico e social dos países receptores, por exemplo, contribuíndo ao rexuvenecemento da poboación. Relacionado con ese tema, indicou que a base de toda boa convivencia é o respecto á diversidade.

Finalmente, preguntounos que solucións se nos ocorrirían para conseguir unha mellor integración en ambos os dous sentidos, pero ao ver que non había moitas ideas propúxonos un reto: imaxínate que pertences a unha asociación cultural que foi contratada para crear uns materiais didácticos para que as persoas que cheguen ao continente europeo, e en concreto, a Galicia e a España, coñezan as súas principais características a nivel económico, social e cultural. 

Coñecer como é a realidade económica, cultural e social da Unión Europea e do país no que vives, axudarache a entender todos os cambios que se produciron nestes últimos anos e a expresalos de forma crítica, ademais de contribuír a conseguir determinadas metas dos ODS (Obxectivos do Desenvolvemento Sostible): -saúde e benestar (obxectivo 3)-, -educación de calidade (obxectivo 4)-, -igualdade de xénero (obxectivo 5), -traballo decente e crecemento económico (obxectivo 8)-, -industria, innovación e infraestruturas (obxectivo 9), -redución das desigualdades (obxectivo 10)-, -paz, xustiza e institucións sólidas (obxectivo 16) e -alianzas para acadar os obxectivos (obxectivo 17)-.

Como reto final terás que elaborar unha serie de produtos finais, a través de diferentes ferramentas e formatos creativos, que che axuden a analizar, comprender e presentar ao resto da comunidade educativa o funcionamento,  a economía e a evolución demográfica e social da Unión Europea, de España e de Galicia. O coñecemento do contorno que habitamos fainos adaptarnos mellor a unha realidade multicultural e cambiante.