Aínda que a globalización económica non se detivo por completo, amosa unha ralentización debida aos motivos vistos para explicar a relocalización industrial.
A estes motivos hai que engadir a saturación dalgunhas rutas e as tensións comerciais e políticas entre potencias como China e Estados Unidos (a chamada "guerra dos aranceis").
Estas situacións provocan subas nos impostos e dificultan o comercio internacional.

Xa vistes que a globalización non impide grandes diferenzas de desenvolvemento e benestar entre países, e vés como se incrementan no seo de cada sociedade cunha tendencia a concentrar a riqueza en poucas mans. Conseguir un reparto máis equitativo é un dos retos dos sistemas.

O desenvolvemento da intelixencia artificial é outro desafío global, xa que está a modificar profundamente a actividade produtiva e destruír moito emprego manual.

A presión sobre o medio natural e os recursos naturais increméntase a medida que as actividades económicas se intensifican e masifican, e a globalización multiplica os desprazamentos de produtos e persoas. 

• A contaminación. Solos e augas (subterráneas e superficiais) contamínanse cos produtos químicos da agricultura, ao igual que cos nitratos que se infiltran a partir dos residuos orgánicos da gandaría intensiva. Os residuos tóxicos da minaría ou as verteduras industriais son tamén importantes fontes de contaminación da auga. O aire contamínase coa industria e os transportes baseados nos combustibles fósiles. Estes tamén ocasionan grave contaminación mariña, por verteduras e accidentes dos buques, en especial os petroleiros. Terra, ríos e océanos énchense de residuos plásticos.

Contaminación mariña por plástico

Os residuos orgánicos da gandaría intensiva contaminan os solos con altos niveis de nitratos

• A emisión de gases de efecto invernadoiro. O transporte con combustibles fósiles e a industria son grandes emisores de CO₂. A gandaría emite gran cantidade de metano.
• O esgotamento dos recursos. A sobreexplotación agraria erosiona e salga o solo, que perde fertilidade. A sobreexplotación pesqueira pon en risco as especies capturadas. Os recursos mineiros son esgotables.
• A deforestación. Intensifícase da man da explotación forestal masiva e ás veces ilegal, o avance da actividade agropecuaria, a construción de infraestruturas e a expansión urbana. É especialmente preocupante nas selvas tropicais e ecuatoriais, por seren os auténticos pulmóns verdes do planeta.

Erosión do solo en terreo agrícola

Deforestación na Amazonia por explotación forestal ilegal

• A alteración do medio natural e dos ecosistemas. A urbanización a causa do turismo, no litoral sobre todo pero tamén en áreas de montaña e noutras paraxes naturais, ten destruído paraxes naturais e alterado correntes litorais, acelerando a erosión dalgunhas praias.
• Residuos. A actividade económica xera inxentes volumes de residuos cuxa xestión e tratamento é un desafío para as autoridades. A isto hai que engadir a toxicidade dalgúns destes residuos. 

África é o destino de gran parte do lixo tecnolóxico, moi tóxico, xerado nos países ricos. Na imaxe podedes ver o vertedoiro de Agbogbloshie, en Ghana. Tamén este tráfico forma parte do comercio mundial

Nas illas Maldivas, un destino turístico paradisíaco no Índico, construíuse a illa artificial de Thilafushi para que servise de vertedoiro do lixo xerado polos turistas. O seu fume tóxico chega ás veces ata a capital do arquipélago

• Elevado consumo de auga. É un recurso vital sometido a gran presión. Os regadíos, a gandaría intensiva, a industria ou o turismo son grandes consumidores tradicionais de auga. A eles súmase a intelixencia artificial: un texto de 100 palabras xerado por IA consome medio litro de auga. A contaminación reduce a auga potable dispoñible mentres a demanda non deixa de crecer.