Segue o percorrido. Chegar primeiro aquí non é importante; o importante é chegar.

Vivides nun mundo interconectado de tal xeito que, cando nun lugar sucede algo, ese feito pode ter reflexo ata no recuncho máis afastado do planeta. A este fenómeno chámaselle globalización.
Dentro deste mundo global, é moi importante coñecer os movementos migratorios e tamén o fenómeno da interculturalidade, pois manifestáronse como dous potentes transformadores da realidade social, cultural e demográfica dos países.

Tamén será transcendental coñecer que son os estados: como son, cales son as súas funcións e as súas institucións; e os organismos internacionais, principalmente a ONU, polo seu papel central na defensa dos dereitos humanos, na promoción da paz e na cooperación entre nacións, e a UE, da que España forma parte.

Por último, e para chegar ao final da senda, analizaredes o Estado español, as súas características e a súa organización institucional e territorial.

Xa sabedes: sen présa pero sen pausa.