Creamos os nosos propios ritmos
- Duración:
- 30
- Agrupamento:
- Ilimitado
Unha vez que xa coñecemos todos os alcumes das figuras e como se representan na linguaxe musical, imos crear os noso propios ritmos para interpretalos despois! Por se as moscas, déixovos de novo a táboa con todas as figuras musicais que precisades por se queredes botarlle un ollo (facer clic no despregable).
Táboa de alcumes nas figuras musicais
Para compoñer os nosos ritmos, seguiremos unha serie de normas previas:
- A duración total de todas as figuras que empreguemos dentro de cada unha das series non pode ocupar máis de catro tempos; será como se estiveramos a traballar no compás de 4/4, que como xa coñecedes soamente admite catro pulsos.
- Empregaremos o metrónomo para seguir a pulsación, e é importante outorgarlle a cada figura o seu valor respectando a pulsación (de maneira constante, sen adiantarse ou atrasarse).
- Podemos escoller figuras ou ben os seus respectivos silencios (neste caso respectaremos a duración do seu valor) .
- Todos os ritmos das persoas que participan deberán ser distintos dentro da mesma quenda.
FUNCIONAMENTO DA ACTIVIDADE
FUNCIONAMENTO DA ACTIVIDADE
PRIMEIRO PASO
Escribimos os nosos ritmos
Cada persoa escribirá tres ritmos diferentes respectando as indicacións anteriores, e cada un deles nun anaco de papel distinto (de maneira que se poidan manipular independentemente). Unha vez todos e todas teñamos creados os tres ritmos, pasaremos á parte práctica da actividade.
SEGUNDO PASO
Escollemos un dos ritmos
Chega o momento de por en práctica o aprendido ata agora! Faremos unha disposición en roda, de maneira que teñamos contacto visual entre todos os participantes. Cada un de nós collerá o anaco de papel dun dos seus ritmos, e colocarao de forma que sexa visible para todos os demais.
Pois ben, o anaco de papel co ritmo que temos cada un de nós representará o noso alcume, é dicir, o nome polo que nos van a chamar.
TERCEIRO PASO
Rolda de presentación
Faremos unha presentación conxunta, seguindo unha orde establecida e sen perder o pulso do metrónomo. Cada integrante do grupo interpretará a súa etiqueta para que os demais compañeiros e compañeiras a coñezan. Respectaremos as quendas de cada un.
Poremos o metrónomo a soar de fondo, picando no seguinte arquivo de audio:
De maneira máis visual, tamén o podedes consultar no seguinte vídeo:
CUARTO PASO
Comeza o xogo!
Unha persoa voluntaria comezará a chamar. Para iso terá que interpretar coa voz o ritmo da etiqueta dun compañeiro ou compañeira que escolla, que será o seguinte en participar e chamará a outra persoa.
Ollo! Non podemos chamar a mesma persoa nunha quenda máis dunha vez. Cando todas as persoas que forman o grupo xa saíron, cambiaremos as etiquetas dos ritmos por unhas novas e comezaremos dende cero. Moito ánimo!