Saltar navegación

Descobre máis: "Baanopstekker"

"Baanopstekker", Holanda

Mapa e bandeira de HolandaSegues por Europa viaxando e paras nos Países Baixos, en concreto na rexión Achterhoek. Nesta zona existe unha danza que pode ser chamada Boanopstekker, Baonopstekker ou Baanopstekker, existen rexistros documentais dos tres nomes. 

Información

Zocas de madeiraEstes bailes realizábanse comunmente con zocos de madeira e roupa grosa, polo que se baila cun estilo sinxelo e natural. As mans libres colócanse nas cadeiras, cos dedos cara diante, por regra xeral.

Escoita

Esta danza báilase en corro.

Camiña polo espazo e intenta facer os pasos como vos indica a música. Pensa se o que escoitas é alegre ou triste, se o que escoitas é un tempo rápido ou lento e intenta amoldar esas emocións e transformalos en pasos para camiñar:

Serían pasos rápidos ou lentos?

Serían pasos pesados ou lixeiros?

Agora proba a camiñar na punta dos pés, saltar, correr ou tumbarte no chan e desprazarte nesa posición. Que movementos se adecúan á peza que escoitas?

E finalmente, cantas frases musicais diferentes escoitas?

Coreografía

Esta canción podémola estruturar en tres partes ou frases.

Frase A
Camiña cara a dereita a primeira metade da frase (compases 1-4), media volta e camiña cara a esquerda (compases 5-8).
Frase B
Da catro pasos para o centro do corro (compases 9-12).
Da catro pasos cara atrás para regresar á nosa posición orixinal (compases 13-16). 
Frase C
Escoita esta frase en silencio.  

Interpreta

Agora colle os instrumentos que hai no centro da clase e interpreta esta canción cos instrumentos de altura determinada.

Arranxo a catro voces de Boanopstekker

Lectura facilitada

Segues viaxando por Europa.
Agora paras nos Países Baixos.
Esta zona chámase Achterhoek.

En Achterhoek existe unha danza tradicional.
Esta danza ten varios nomes.
Pode chamarse Boanopstekker.
Tamén pode chamarse Baonopstekker.
Outro nome é Baanopstekker.
Todos estes nomes aparecen en documentos antigos.

Esta danza bailábase con zocos de madeira.
Tamén se usaba roupa grosa.
O baile é sinxelo e natural.

Apoio visual

Tes dúas opcións para escoitar e seguir a partitura de forma interactiva: a ligazón en Musescore (abre nunha nova xanela) ou o reprodutor inserido a continuación.

Improvisa!

Hai xa unha coreografía e tamén unha proposta de interpretación pero.. falta algo, non si?

Queda unha frase para a cal aínda non se engadiu nada.

Pensa propostas de percusión corporal que poidan acompañar esa frase C de forma individual.

Agora vas ser solistas... por quendas.

Frase C

Nos catro primeiros compases o solista fai unha proposta de percusión corporal moi sinxela.

Nos catro compases seguintes o resto do grupo repite esa proposta de percusión corporal.

Nas frases A e nas frases B segues facendo a mesma coreografía previamente traballada.

Cada vez que sae a frase C o solista vai ser o estudante que estea á esquerda do que xa fixo de solista.

E un último engadido...

Pero o solista non so vai intervir na frase C. Tamén na frase B.

Esta coreografía servía para que a xente se coñecese... cando na frase B os pasos nos achegan os uns aos outros o solista vai dicir un saúdo (xusto ao final desa semifrase).

O grupo completo, ao separarse, vai repetir o saúdo... xusto ao final da frase B.

Practica o saúdo na frase B e fai a canción completa...

Un último apunte... non se pode repetir o idioma do saúdo!, así que... utiliza cinco minutos para buscar saúdos en máis dun idioma.

Propoñede a vosa versión

Realizade a vosa propia versión: 20 minutos Agrupamento: 4-5 persoas

Agora que xa traballastes a improvisación podedes, en grupo, fixar unha versión para a actuación final.

Por grupos, facede cada un de vós unha proposta de pasos sinxela para a frase C, facendo a práctica deles.

Unha vez fixada a proposta do grupo, ensinádella ao resto da clase.

Agora practicade as distintas versións da frase C. Podedes facer cada vez unha distinta ou ben podedes fixar sempre a mesma; poñédevos de acordo co resto do grupo.

Practicade a versión final da vosa danza holandesa.

Desta danza existen numerosos exemplos na rede, incluso duns pasos coreográficos habituais para a frase C:

Partitura e partes instrumentais de "Baanopstekker"

Aquí tes a partitura e partes instrumentais de Baanopstekker. 

Creado con eXeLearning (Ventana nueva)