Unha viaxe polo mundo: creando un conto musical intercultural
3.5. Oceanía
Glosario
Aborixe
Definición:
Persoa ou pobo orixinario dun territorio, que habitaba ese lugar antes da chegada doutros pobos ou da colonización. O termo úsase para referirse ás comunidades indíxenas que manteñen tradicións culturais, linguas e formas de vida propias en uso desde fai varios séculos.
Exemplo:
Os pobos aborixes de Australia conservan tradicións musicais propias que se transmiten de xeración en xeración.
Antípodas
Definición:
As antípodas son os lugares da Terra que están xusto no lado contrario doutro lugar, é dicir, se un está nun punto do planeta, as súas antípodas están no punto oposto do globo terráqueo.
Exemplo:
Cando aquí é mediodía nas antípodas é medianoite.
Colonialismo
Definición:
Proceso polo cal un país ou poder externo ocupa, domina e controla outro territorio, impoñendo a súa autoridade política, económica e cultural.
Exemplo:
Ademais de en América, o colonialismo europeo provocou cambios profundos nas culturas indíxenas de Oceanía.
Un continente diverso
Chegas ás antípodas, Oceanía. Son un amplo conxunto de illas do océano Pacífico cunha grande diversidade cultural, lingüística e musical. As súas zonas son Melanesia, Micronesia e Polinesia, nestas culturas a música é un elemento central da vida comunitaria e relaciónase coa natureza, a organización social e as crenzas espirituais.
As tradicións musicais transmítense de forma oral e teñen un forte carácter colectivo, deste xeito o canto e a danza aparecen unidos cumprindo funcións sociais diversas. Predomina o uso da voz e de instrumentos sinxelos feitos con materiais naturais, con ritmos repetitivos e melodías breves que facilitan a participación do grupo.
Desde a colonización europea incorporáronse novos instrumentos e influencias musicais, que en moitos casos se mesturaron coas tradicións locais, dando lugar a formas musicais híbridas.
Características da música de Oceanía
Para o seu estudo, a música de Oceanía organízase en tres grandes áreas culturais.
En Melanesia predominan o canto colectivo e a percusión, moi ligados a rituais, cerimonias e celebracións comunitarias.
En Micronesia destacan as tradicións vocais sinxelas e repetitivas, pensadas para a transmisión oral de historias e da memoria colectiva.
En Polinesia, a música está estreitamente unida á danza e ao movemento corporal, que forman parte esencial da expresión simbólica.
Lectura facilitada
Chegas a Oceanía. Oceanía está formada por moitas illas do océano Pacífico.
En Oceanía hai moitas culturas diferentes. A música é moi importante na vida das persoas. A música relaciónase coa natureza e coas crenzas.
A música transmítese de forma oral. O canto e a danza fanse en grupo. A música ten funcións sociais.
Úsase moito a voz. Os instrumentos son sinxelos. Os instrumentos fanse con materiais naturais.
Coa chegada de europeos entraron novos instrumentos. Estas músicas mesturáronse coas tradicións locais.
En Melanesia destaca o canto e a percusión. En Micronesia a música vocal é sinxela e repetitiva. En Polinesia a música está unida á danza.
Audio
Coñeces xa a música de Oceanía?
A canción Waltzing Matilda ten unha forte influencia europea. A súa melodía e forma musical proceden de tradicións traídas por inmigrantes europeos como os británicos. Esta peza non ten un único compositor, senón que é froito da colaboración de dúas persoas. A letra foi escrita por Banjo Paterson no ano 1895, mentres que a melodía foi achegada por Christina Macpherson, a partir dunha música de orixe europea.
A combinación entre texto e música deu lugar a unha canción tradicional australiana que reflicte tanto a identidade local como a influencia das tradicións musicais europeas, por exemplo o termo waltzing vén do vals europeo, un baile moi popular no século XIX. É un exemplo de como a música australiana mestura elementos europeos con historias e personaxes propios do país.
Visualiza o vídeo de Waltzing Matilda e contesta as preguntas
.svg.png "Oceanía")