Síncope

A síncope é un recurso rítmico que altera o ritmo regular ao acentuar un tempo débil no lugar dun tempo forte. Normalmente lógrase alongando unha nota débil ata o inicio do tempo forte.

As síncopes son habituais en xéneros como o jazz ou a música latina e achegan sensación de tensión, movemento e sorpresa.

Polirritmia

A polirritmia é a utilización simultánea de dous ou máis ritmos diferentes, cada un coa súa unidade propia, sen que un derive do outro.

É frecuente cando unha parte marca un ritmo e outra parte mantén un distinto ao mesmo tempo.

Ostinato

O ostinato é un motivo que se repite moitas veces durante unha parte longa dunha composición. Pode ser rítmico ou melódico e pode repetirse igual ou con pequenas variacións.

A repetición na música

Cando compós unha canción moitas veces é necesario repetir ideas para darlle unha forma coherente. Ao repetir unha melodía, o noso cerebro reláxase porque xa coñece e comprende o que escoita.

Existen unha serie de símbolos que permiten que non teñamos que escribir toda a música dúas veces, xa que nos indican que debemos repetir o fragmento musical.

Hai moitos símbolos, pero ides aprender os máis comúns, xa que os veredes nas partituras desta viaxe.

• Repetición desde o inicio

Se ves o símbolo dous puntos mirando para á esquerda, significa que tes que volver a tocar/cantar a música que acabas de tocar. Desde o principio.

a)

Esta partitura, sen o símbolo de repetición, leríase así:

• Repetición dun fragmento no medio dunha partitura

Se ves o símbolo de repetición (a) pero con anterioridade atopaches dous puntos mirando para á dereita: 

b)

Significa que a repetición xa non comeza desde o inicio, senón desde onde hai estes dous puntos mirando para a dereita.

Esta partitura, sen o símbolo de repetición, leríase así:

• Primeira e segunda vez

Se enriba dun ou varios compases ves un 1 que os enmarca e ao final aparece o símbolo de repetición, e despois ves un 2 que enmarca outro ou outros compases, significa o seguinte:

Tes que repetir a música.
Na primeira vez interprétanse os compases da 1ª casa.
Na segunda vez, eses compases xa non se tocan e pásase directamente aos compases da 2ª casa.

c)

Esta partitura, sen o símbolo de repetición, leríase así:

Existen outros símbolos que che permiten repetir directamente un compás só, ou levarche ao inicio despois dun fragmento moi longo, como é Da Capo, que en italiano significa desde a cabeza (D.C.). Tamén podemos atopar unha variante deste se vemos Dal Segno (D.S.) que significa que debemos seguir tocando onde vexamos un S ou sinal como esta letra. Porén, xa irás descubrindo pouco a pouco estes símbolos.