Documéntate ben!

imaxe da sección de cómic dunha biblioteca. Acabas de realizar un traballo monográfico sobre a banda deseñada galega en xeral, pero sabes cal é a situación da banda deseñada no teu centro en particular? Para poder levar a cabo esta investigación, é fundamental que revises todos os documentos que poidan serche de utilidade, e que mellor que a biblioteca do teu centro para isto? Ese é o lugar onde máis mostras poderás atopar sobre a banda deseñada, e é hora de poñerse mans á obra.

Vai á biblioteca e revisa os cómics dispoñibles en galego.

Fai primeiro unha reflexión global sobre eles e, logo, escolle o que máis che chamase a atención para presentarllo ao resto da clase.

Lectura facilitada

Xa fixeches un traballo sobre a banda deseñada galega.

Agora pensa: Como é a banda deseñada no teu centro?

Para isto, investigarás a biblioteca do teu instituto.

Alí atoparás bandas deseñadas. Úsaas para este traballo.

Sigue os seguintes pasos:

1. Busca na biblioteca os cómics en galego.

2. Fai unha descrición de que tipo de cómics son.

3. Escolle un que chame a túa atención e preséntallo ao resto do grupo.

Audio

Unha pequena axuda?

Nesa inspección da biblioteca fíxate en aspectos como os seguintes:

Hai unha sección específica para a banda deseñada ou estes libros están mesturados con outro tipo de literatura?
Hai máis mostras en castelán ou en galego?
Cantos títulos atopaches en galego?
Coñecías previamente algún dos cómics? Cales?

Estas preguntas poderán servirche de guía. Despois de toda esta revisión, escolle a banda deseñada que queiras compartir cos teus compañeiros e compañeiras.

É hora de compartir o caso

Agora que xa revisaches a biblioteca e escolliches unha banda deseñada, chegou o momento de presentarlla ao resto da clase. Prepara para isto un pequeno guión que che permita realizar unha breve exposición oral de entre 2 e 3 minutos.

Para a túa exposición, decide con que tipo de apoio prefires contar: por exemplo, podes levar o libro fisicamente ou preparar unha presentación.

Sé orixinal e non deixes a ninguén indiferente!

Unha posible estrutura

Se precisas axuda para decidir como estruturar a túa exposición, podes inspirarte neste guión:

Introdución: cal é a situación da banda deseñada na biblioteca?
Presentación da túa escolla: que cómic escolliches? Aproveita para ensinarllo ao grupo (ben fisicamente, ben a través dalgunha imaxe).
Xustificación da escolla: explica por que te decantaches por esa banda deseñada (lembra que non hai unha resposta correcta, calquera razón é válida se é a túa).
Argumento: resume o argumento da banda deseñada, pero coidado con non facer espóiler!
Opinión: presenta a túa opinión sobre o libro e indica a que tipo de lector llo recomendarías.