Misión 1:

Escolla do texto e adaptación.

Neste primeiro momento, ti e mais o teu equipo decidiredes cal será o texto sobre o que basearedes o voso cómic. Poderedes escoller entre:

• Seleccionar un conto clásico (Carapuchiña vermella, Os tres porquiños...).
• Elaborar unha historia propia orixinal.

Unha vez teñades o texto de base, crearedes o texto definitivo do voso cómic, tendo xa en conta as características básicas da banda deseñada.

Misión 2:

Establecemento da estrutura e esbozo inicial.

Unha vez decididos o texto e o formato do cómic, estableceredes a súa estrutura. Decidiredes cantas viñetas terá, como se dividirá o texto nas viñetas etc. Feito isto, trazaredes un bosquexo previo, representando xa os personaxes (coa aparencia o máis semellante posible á que terán na versión definitiva), estruturando a historia en viñetas e introducindo o texto nos globos de diálogo.

Misión 3:

Deseño global do cómic.

Agora chega o momento de tomar decisións sobre o deseño xeral da banda deseñada. Para isto consensuarás co teu equipo que tipo de cómic elaboraredes:

• Terá cor ou será en branco e negro?
• Deseñarédelo á man ou en formato dixital?
• Seguirá o modelo manga?

Misión 4:

Creación da banda deseñada.

Agora si, mans á obra! Baseándovos no voso bosquexo, elaboraredes o deseño final. De seguro que vos queda unha banda deseñada ben xeitosa!

Misión 5:

Edición do “Como se fixo”.

Dende o inicio do proceso, gravaredes os diferentes pasos que vaiades dando ata chegar ao resultado final. Nese momento, montaredes un vídeo con ese material, para deixardes pegada de todo o traballo que hai detrás da vosa banda deseñada. Ademais, isto axudará a dar difusión á vosa creación.