Chegou o momento!

Imaxe que amosa a unha persoa compartindo un arquivo dende un móbil cara á rede.

Imaxinas unha serie de televisión que nunca se emita ou un programa de radio que só escoitasen as persoas que o gravasen? Serían produtos baleiros que non cumprirían a súa función. O mesmo ocorre cos pódcasts en que tanto traballastes nesta aventura: chegou o momento de difundilos para que todo o mundo poida gozar deles.

Para iso, podedes escoller dúas vías ou incluso facer as dúas:

Opción A: subide o voso pódcast á plataforma iVoox, moi sinxela de manexar, e que funciona como repositorio gratuíto de numerosos pódcasts. Logo, eses enlaces poderán compartirse desde a páxina web do centro, para darlles verdadeira difusión.
Opción B: se contades con radio escolar no voso centro, aproveitade para facer un programa en directo; xa tedes o guión e práctica na gravación, seguro que non resulta tan difícil como puidese parecer ao principio!

Adiante!

Lectura facilitada

Chegou o momento de publicar o voso pódcast

Un programa de radio ou un pódcast están feitos para que a xente os escoite.

Se ninguén os oe, o traballo queda baleiro.

Por iso, agora tedes que difundir o voso proxecto para que todo o mundo o poida gozar.

Podedes escoller unha destas dúas opcións (ou facer as dúas):

Opción A: subilo a internet

Usade a plataforma iVoox.

É unha páxina gratuíta e moi fácil de usar para gardar pódcasts.

Despois, podedes coller o enlace e poñelo na páxina web do voso colexio ou instituto.

Así, moita máis xente poderá premelo e escoitarvos.

Opción B: facelo na radio do colexio

Se o voso centro ten radio escolar, podedes facer o programa en directo.

Como xa tedes o guión escrito e xa practicastes a gravación, será moito máis doado do que pensades

Conclusión: o máis importante é que o voso esforzo chegue aos oíntes. Ánimo e adiante!

Audio

Como te comportas?

Imaxe que amosa a unha muller rodeada de símbolos dixitais.

Do mesmo xeito que non te comportas igual ao ceares unha pizza no sofá que nun banquete, tamén existen normas de etiqueta dixital que establecen como se debe actuar nas interaccións que establecemos na rede. Para poder publicar os pódcasts en iVoox e posteriormente compartilos dende a páxina web do centro é importante coñecer estas normas e actuar conforme ao que establecen.

Para isto, nos propios equipos de traballo, realizade unha investigación na rede para descubrir as principais normas de etiqueta dixital, tamén coñecidas como netiquetas. Logo, elaborade un decálogo coas que consideredes máis relevantes.

Por último, votade para escoller a mellor proposta de decálogo e propoñédeo para que se inclúa na páxina web do centro.

Que é un decálogo?

Un decálogo é un conxunto de normas que regulan unha determinada actividade. O seu nome vén de que, inicialmente, os decálogos estaban compostos por dez normas. Actualmente, non é preciso que sexan exactamente dez, aínda que este número segue sendo orientativo; é dicir, non incluades só catro normas, pero tampouco moitas máis de dez.

Ademais, pola relevancia que ten un decálogo, adoita buscarse que teña un deseño visual e orixinal, que chame a atención de quen o vexa, para que lea todas as normas e así poida cumprilas. Podedes buscar algún modelo de decálogo e editalo coa vosa temática e as vosas normas.

Lectura facilitada

Que é un decálogo?
Un decálogo é unha lista de normas ou regras para facer ben unha actividade.

Cantas normas debe ter?
O nome "decálogo" vén do número dez.
O ideal é que teña arredor de 10 normas.
Non deben ser moi poucas (como 4), pero tampouco moitas máis de 10.
Como debe ser o seu deseño?
O deseño é moi importante porque axuda a que a xente queira ler as normas. Debe ser:

Visual: con cores ou iconas que axuden a entender as ideas.
Orixinal: que chame a atención de quen o mira.
Claro: para que as normas se lean e se cumpran con facilidade.

Consello: Podedes buscar modelos en internet (como en Canva) e cambialos para poñer as vosas propias normas e o tema que escollestes.

Audio

Apoio visual

Mostra de exemplo dun decálogo