Saltar navegación

3.5. Tira do fío

 

Glosario

Adversario

Pictograma de dúas persoas con opinións opostas.

Definición:

Persoa que mostra resistencia ou oposición contra algo ou alguén.

Exemplo:

Xoana é a miña adversaria no debate.

Dica

Pictograma dunha persoa dando unha indicación.

Definición:

Recomendación sobre como facer ou actuar nunha situación.

Exemplo:

Deume unhas dicas para saber chegar á praza.

Versus

Pictograma dun marcador de resultados.

Definición:

Termo latino que significa ''oposto a''.

Exemplo:

Xogouse o Breogán versus Obradoiro.

Vai de xornais!

Pictograma dun xornal - medios de comunicaciónNós Diario, Galicia Hoxe, Praza.gal, entre outros, son xornais publicados de xeito diario en Galicia. Todos eles seguen unha estrutura similar, coñécela?

Os textos xornalísticos poden ser de diferentes tipos:

Textos informativos

Pictograma de exemplo dun texto informativo dunha revista.O seu obxectivo é informar con datos reais, sen mostrar opinións.

  • Novas: contan feitos recentes, son claras, obxectivas e breves. Deben responder as seis preguntas básicas: que, quen, cando, onde, como e por que.
  • Reportaxes: a información que recollen é máis ampla que na nova. Inclúen explicacións, descricións e en ocasións testemuñas. Adoitan profundar en temas de interese social.
  • Entrevista: trátase dunha conversa cunha persoa para coñecer a súa opinión ou experiencia dun tema. Conta con preguntas e respostas.

Textos de opinión

Pictograma de exemplo dun texto informativo dun xornal. O seu obxectivo é explicar ou defender unha opinión sobre un tema de actualidade.

  • Artigo de opinión: está escrito por unha persoa experta ou colaboradora do xornal que expón as súas ideas persoais sobre un tema.
  • Editorial: representa a opinión do xornal e non dun autor concreto, nunca aparece firmada e adoita tratar temas de actualidade.
  • Carta ao director: está escrita por lectores ou lectoras que expresan opinións ou queixas sobre asuntos que lles afectan.

Textos mixtos

O seu obxectivo é informar deixando ver a interpretación ou valoración do autor.

  • Crónica: é un relato dos feitos no mesmo momento ou pouco despois de aconteceren, combina información e valoración persoal.
  • Crítica: é a opinión e valoración sobre temas culturais.

Ademais podes descargar os apuntamentos sobre isto aquí (abre en nova xanela). Deste xeito, coñecerás as características dos apuntamentos, un tipo de texto moi importante para ti como estudante.

Apoio visual

Infografía sobre os textos xornalísticos

Pola mañá, le o xornal

Agrupamento:
Por parellas

E ti, liches algunha vez un xornal? 

Colle un en formato papel e xunto coa túa parella identifica cando menos un texto xornalístico de cada tipo dos que viches anteriormente.

Vai de novas!

Para ser unha ou un xornalista de calidade, as novas que redactes deben contar coa seguinte estrutura:

Titular

É o título da noticia e adoita resumir a idea principal. Debe chamar a atención das persoas lectoras.

Subtítulo

É opcional. Amplía ou concreta o titular e pode engadir información clave.

Entradiña/ Lead

Está formado polo primeiro parágrafo, resume o esencial da noticia respondendo ás 6 preguntas clave (que, quen, cando, onde, como e por que), buscando captar o interese de quen o lea.

Corpo

Desenvolve toda a información. Normalmente inclúe: antecedentes, detalles dos feitos, declaracións, cifras, contexto, explicacións...

Peche

Pode ofrecer unha conclusión ou mostrar as consecuencias dos feitos.

Elementos visuais

Son opcionais. Trátase de fotografías, gráficos, mapas...

Descarga aquí (abre en nova xanela) o resumo da información. De novo se trata duns apuntamentos, que poderás modificar, editar ou completar coas indicacións que che forneza a túa profesora ou profesor.

Un rifi rafe con xeito

Pictograma de dúas persoas falando

Dicas para facer un bo debate:

Comprende o tema

  • Asegúrate de que coñeces ben o tema a defender.
    • Se o tema é ''transporte público VS transporte privado'' pensa: estou a favor ou en contra? Por que? 

Prepara argumentos sinxelos

  • Argumentos numéricos: baséanse en datos reais, cifras, estatísticas...
    • O 80 % da poboación prefire o vehículo propio fronte ao autobús urbano.
  • Argumentos de autoridade: baséanse nunha persoa experta, nunha institución...
    • Greenpeace advirte da importancia de coidar o medioambiente.
  • Argumentos de exemplo: baséanse nun caso real.
    • Na nosa clase empregamos o transporte público para vir ao instituto.

Emprega a linguaxe non verbal

  • Trátase de convencer o adversario cos teus argumentos, polo que deberás:
    • Mirar ao público
    • Manter unha postura firme
    • Usar as mans

Actúa dende o respecto

  • Atende as quendas de palabra (sé cooperativa/o).
  • Emprega a cortesía (mostra acordo ou desacordo de maneira axeitada, non se pode ser groseira/o).

Queres derrotar os teus opoñentes?

Agrupamento:
4 - 6 participantes

Forma grupos de seis integrantes, escollede un dos seguintes temas e a continuación preparade os argumentos a favor ou en contra, lembrade que tres persoas deberedes estar a favor e as outras tres en contra. Seredes quen de convencer o grupo adversario?

Temas

Medioambiente

Debería prohibirse o uso de plásticos?

Redes sociais

Debería estar prohibido o uso de redes sociais a menores de 14 anos?

Educación

Son necesarios os deberes?

Vida saudable

Debería prohibirse o uso de bebidas con alto contido de azucre?

Lembra empregar as dicas que viches previamente.

Diario de aprendizaxe

Icona representativa do Diario de aprendizaxe do proxecto cREAgalSénteste abatida/o?

Despois de participar no debate colle o teu diario de aprendizaxe e reflexiona sobre os contidos debatidos. Segues tendo a mesma opinión ou cambiaches? Engadirías algún argumento máis ao teu posicionamento? Con que argumento dos teus compañeiros quedarías?

Feito con eXeLearning (Nova xanela)