Neste reto...
Traballarás en equipo para crear un pódcast en galego. Para isto irás dando diferentes pasos: decidir a temática, elaborar o guión, deseñar unha entrevista, traballar nun estudio de gravación...
Serás quen de engaiolar a audiencia?
Quen ten boca, ten pódcast!
1.1. O primeiro é o primeiro
Que ten por finalidade o reto?
Para chegar a realizar o teu propio pódcast vas ter que:
- Decidir a temática, o ton e as seccións do teu pódcast.
- Crear un guión de forma cooperativa coas túas compañeiras e compañeiros.
- Planificar e realizar unha entrevista a unha persoa da túa contorna.
- Preparar o estudio para levar a cabo a gravación.
- Realizar a produción e posprodución do pódcast.
- Difundir o resultado final.
A que meta chegarás co reto?
Unha vez que acades o reto, isto é, co pódcast realizado en galego, serás quen de:
- Coñecer diferentes formatos de textos dos medios de comunicación e das redes sociais (como as entrevistas).
- Coñecer textos do ámbito académico como os apuntamentos, mapas conceptuais e exposicións.
- Planificar un texto oral con adecuación, coherencia e cohesión.
- Empregar técnicas relacionadas coa modulación da voz e a expresión oral.
- Debater sobre un tema.
- Usar correctamente diferentes fórmulas de cortesía conversacional.
- Empregar aplicacións TIC relacionadas coa gravación de voz e coa edición de arquivos de audio.
- Coñecer as características da novela e de diferentes subxéneros narrativos e reproducir a súa estrutura.
- Comprender as diferentes relacións entre os significados das palabras.
- Coñecer categorizacións básicas da oración.
Audio
Licenciado baixo a Licenza Creative Commons Atribución Non-comercial Compartir igual 4.0