Saltar navegación

2.1. E se o facemos en verso?

 

Glosario

Lírica

Pictograma de libros de poesía e arte.

Definición:

Un dos xéneros literarios. Relativo á poesía.

Exemplo:

A lírica medieval galego-portuguesa é un gran fito literario.

Contemporánea?

Caderno cos versos

A lírica contemporánea é aquela que se escribe na actualidade, nas últimas décadas do século XX e no XXI. As autoras e autores expresan sentimentos, ideas ou reflexións persoais de maneira creativa. É unha poesía máis libre, máis próxima e conectada coa realidade actual.

As características principais desta lírica son:

  • Liberdade: non ten que ter rima nin esquema rimático fixo.
  • Expresión persoal: fala de experiencias, emocións e experiencias propias.
  • Temas actuais: identidade, amor, ecoloxía, feminismo, sociedade...
  • Creatividade: pode mesturar música, imaxe, redes sociais...

En galego temos, por exemplo, a Yolanda Castaño ou a Carlos Negro. En portugués, a José Luís Peixoto ou a Ana Luís Amaral. En éuscaro, a Miren Agur Meabe ou a Kirmen Uribe. E en catalán, a Marc Granell ou a Maria Mercè Marçal.

A pesar de escribiren en diferentes linguas, falan de cousas semellantes: quen somos, que sentimos e como vemos o mundo.

Algúns levaron o Premio Nacional de Poesía: Yolanda Castaño e Miren Agur Meabe ou o Premio da Crítica Kirmen Uribe e Marc Granell.

Lectura facilitada

A lírica contemporánea é a escrita a finais do século XX (vinte) e no XXI (vinte e un).

Características principais:

  • Liberdade: non ten que seguir regras fixas nin ter rima.
  • Expresión persoal: fala das emocións e das experiencias propias.
  • Temas actuais: trata temas como a identidade, o amor, a ecoloxía, o feminismo ou a sociedade.
  • Creatividade: pode mesturar poesía con música, imaxes ou redes sociais.

Autores e autoras:

  1. En galego: Yolanda Castaño e Carlos Negro.
  2. En portugués: José Luís Peixoto e Ana Luísa Amaral.
  3. En éuscaro: Miren Agur Meabe e Kirmen Uribe.
  4. En catalán: Marc Granell e Maria Mercè Marçal.

Escriben en linguas diferentes pero tratan os mesmos temas: o que somos, o que sentimos, como vemos o mundo...

Algúns recibiron premios importantes como o Premio Nacional de Poesía ou o Premio da Crítica. 

Apoio visual

Mapa conceptual da lírica contemporánea

En vídeo!

Cámara.A poesía pode transmitir moitas sensacións. A lingua literaria é plurisignificativa; o que imaxinas ti ao ler ou ao escoitar un poema, é diferente ao que imaxina outra persoa.

Isto é do que trata a seguinte actividade: unha fotomontaxe. Sabela está encantada, xa que une as súas dúas grandes paixóns: a poesía e a fotografía.

E ti, anímaste a ser artista?

Lectura facilitada

A poesía pode transmitir moitas sensacións.

Cada persoa imaxina cousas diferentes cando le ou escoita un poema.

Esta actividade consiste en facer unha fotomontaxe.

Sabela está moi contenta porque pode xuntar dúas cousas que lle gustan moito: a poesía e a fotografía.

E ti, queres probar a ser artista?

Lembras como se recita?

Para recitares ben un poema:

  • Debes ler e entender o significado de cada verso.
  • Coñecer as emocións que transmite a mensaxe.
  • Falar alto e claro con boa entoación e sen trabucarte nas palabras.
  • Respectar a puntuación e as pausas.
  • Darlle a entoación axeitada (alegría, tristeza, enfado…).
  • Usar xestos naturais que acompañen o poema sen esaxeracións.

Lectura facilitada

Para recitares ben un poema:

  • Le o poema e entende o que quere dicir cada verso.
  • Pensa nas emocións que che transmite.
  • Fala alto e claro.
  • Pronuncia ben as palabras.
  • Respecta as pausas.
  • Cambia a voz segundo a emoción que che suxira.
  • Exprésate con xestos naturais pero non esaxeres.

Escoita recitar

Obra derivada a partir do poema “Eu teño medo”, do libro Cando petan na porta pola noite de Xabier P. Docampo. ISBN 9788488254931 (Todos os dereitos reservados). Eu teño medo. Cando petan na porta pola noite ( CC BY-NC-SA 4.0)



Audio

Fotomontaxe

Tes que elaborar unha fotomontaxe cun poema relacionado coa natureza. Mesturará imaxes e audio.

  1. Escolle o poema que queiras. A profesora pode axudarche.
  2. Cando o les que che transmite? Busca imaxes en internet, en libros ou fai ti debuxos ou fotografías que axuden a reflectilo. 
  3. Grávate recitando o poema.
  4. Fai unha fotomontaxe coa voz.

Podes facelas co ordenador, coa tableta ou co teléfono. Hai moitos programas que che axudan dun xeito moi doado.

Consellos

  • Súbea á aula virtual ou tráea nun USB.
  • Ollo! Faina con tino porque terás que recuperala para a Fase 5.
  • Se queres inspiración, podes procurar exemplos na rede.

Feito con eXeLearning (Nova xanela)