Feira de Santos

Dende hai moitos anos celébrase en Monterroso a coñecida Feira de Santos. Como poderás comprobar, non se trataba só dun día para mercar e vender produtos. As feiras eran momentos moi importantes na vida das persoas. Alí non só se facían tratos comerciais, senón que tamén se realizaban xestións importantes: facer papeis, pagar taxas, acudir ao médico ou resolver asuntos administrativos. Ademais, eran lugares de encontro onde a xente se relacionaba, intercambiaba novas, reforzaba amizades e establecía contactos.

Pintura en branco e negro dunha feira antiga no barrio vigués do Berbés.

Se ti viras o que eu vin! Así di o cantar popular propio da feira de Monterroso.

Reflexiona sobre a importancia que tiveron as feiras en Galicia ao longo do tempo: por que eran tan importantes nunha sociedade maioritariamente rural?

E agora?

Pensa tamén no presente. Hoxe en día, moitas feiras tradicionais seguen existindo e conservan o seu valor cultural e social. Ao mesmo tempo, xorden novas feiras adaptadas aos tempos actuais: feiras do libro, feiras de innovación, feiras de turismo, feiras de arte… Aínda que cambien os produtos ou os temas, seguen sendo espazos de encontro, intercambio e convivencia.

Lectura facilitada

As feiras foron moi importantes en Galicia durante moitos anos. Moita xente vivía no campo e as aldeas estaban afastadas. Por iso, a feira era un momento especial.

Nas feiras neses anos as persoas compran e venden produtos. Poden mercar comida, roupa, animais ou ferramentas para traballar.

Tamén é un lugar onde se fan outras cousas importantes: papeis importantes, pagar taxas ou ir ao médico.

A feira tamén é un lugar para falar con outras persoas. A xente atopábase con familiares, amizades e veciños. Contaban novas e sabían o que pasaba noutros lugares.

Hoxe moitas feiras seguen existindo. Algunhas son tradicionais, como a Feira de Santos de Monterroso. Outras son novas, como as feiras do libro ou de turismo.

As feiras seguen sendo importantes porque son lugares de encontro e convivencia.

Audio

Descubre a Feira de Santos de Monterroso

Na seguinte ligazón podes atopar información sobre ela e descubrir a súa longa historia.

Accede á web da Feira de Santos (Abre en nova xanela).

En grupo

Duración: 15 minutos Agrupamento: Parellas ou pequenos grupos

Pon en común coa clase as túas reflexións e comentade se credes que as feiras seguen tendo hoxe a mesma importancia que antigamente ou se o seu papel mudou. Xustificade as vosas opinións con argumentos.

O de antes e o de agora

Anota no teu caderno as reflexións do grupo.

Podes empregar como exemplo a seguinte táboa:

As feiras de antes e as de agora...
Similitudes e diferenzas	Argumentos antes...	Argumentos agora...
Exemplo: Sobre a venda de gando	Nos días de feira aproveitábase para a compra-venda de gando.	Por motivos sanitarios e para regularizar a actividade económica, estableceuse un recinto feiral axeitado para o gando.
Sinalando distintos aspectos engadide máis filas...	...	...

Tocará feirear?

Imaxe do diario de aprendizaxe no proxecto cREAgal. Amosa un lapis e un caderno co logotipo do proxecto na tapa. Que tal esta primeira parte?

Tes todo un proxecto que facer. Cada un de vós achegará algo para conseguilo. Trato feito?

Que che parece a idea de montar un posto nunha feira universitaria?

Abre o teu diario de aprendizaxe e completa as preguntas que aparecen na fase 1.