Os pasos
Ides organizar e participar nunha emisión en directo de Galegas polo mundo!
- Encargarédesvos de converter a aula nun estudio de televisión para simular conexións con diferentes partes do mundo.
- Empregaredes danzas e xogos como elementos transmisores da cultura e as tradicións dun lugar.
Antes de comezar, consultade o plan que ides seguir para que todo saia perfecto!
Pasos que cómpre seguir
1. Formación de equipos
Traballaredes en equipos de 5-6 persoas, nos que cada un/ha de vós terá unha responsabilidade específica. Formaredes os equipos e repartiredes os roles na Fase 2.
2. Exploración de coñecementos previos
Activaredes os coñecementos previos sobre danzas e xogos a través de diferentes actividades ao longo da Fase 2. Isto permitiravos preparar ben as representacións que formarán parte da emisión en directo.
3. Experimentación e selección de contidos
Por grupos, representaredes e participaredes nas principais danzas e xogos galegos e do mundo, recoñecendo os seus elementos principais, a súa música e materiais característicos, o seu modo de representación (individual ou grupal), etc. Logo da experimentación, escolleredes unha danza e un xogo dos que practicastes para representar durante a emisión de Galegas polo mundo! Faredes todo isto ao longo da Fase 3.
4. Organización e deseño da emisión en directo
Para que a emisión sexa un éxito, elaboraredes o seu guión, recompilaredes o material necesario e faredes un pequeno ensaio ao comezo da Fase 4.
5. Desenvolvemento da emisión en directo
Dedicaredes unhas sesións a facer as conexións de Galegas polo mundo! simulando vivir nun país estranxeiro dende o que explicaredes á vosa audiencia (a vosa aula) que xogo ou danza galego levastes con vós, ao tempo que compartides unha danza ou xogo do lugar en cuestión. Con esta emisión remata a Fase 4.
6. Reflexión e avaliación
Na Fase 5 faredes un repaso visual de todo o aprendido e valoraredes o voso traballo e o dos compañeiros e compañeiras ao longo de todo o reto.
Lectura facilitada
Ides organizar e participar nunha emisión en directo de Galegas polo mundo!
Facer Galegas polo mundo! implica:
- Converter a aula nun estudio de televisión.
- Simular conexións con diferentes partes do mundo.
- Empregar danzas e xogos para transmitir a cultura e as tradicións dun lugar.
Aquí tedes o plan que cómpre seguir:
Pasos que cómpre seguir
1. Formación de equipos
- Traballaredes en equipos de 5-6 persoas.
- Cada un/ha vós terá unha responsabilidade específica.
- Formaredes os equipos e repartiredes os roles na Fase 2.
2. Exploración de coñecementos previos
- Repasaredes danzas e xogos a través de actividades ao longo da Fase 2.
- Este repaso permitiravos preparar ben a emisión en directo.
3. Experimentación e selección de contidos
Ao longo da Fase 3:
- Representaredes as principais danzas galegas e do mundo.
- Participaredes en xogos galegos e do mundo.
- Recoñeceredes os elementos principais das danzas e xogos.
- Escolleredes unha danza e un xogo dos que practicastes para representar durante a emisión de Galegas polo mundo!
4. Organización e deseño da emisión en directo
Ao comezo da Fase 4:
- Elaboraredes o guión da emisión en directo.
- Recompilaredes o material necesario.
- Faredes un pequeno ensaio xeral.
5. Desenvolvemento da emisión en directo
Ao final da Fase 4, adicaredes unhas sesións a facer as conexións de Galegas polo mundo!
Durante as conexións:
- Simularedes vivir nun país estranxeiro.
- Representaredes un xogo ou danza galego.
- Compartiredes unha danza ou xogo estranxeiro.
6. Reflexión e avaliación
Na Fase 5:
- Faredes un repaso visual de todo o aprendido.
- Valoraredes o voso traballo.
- Avaliaredes o traballo en equipo.
