Glosario
Conquistar
-
Definición:
-
En xogos de mesa, alcanzar ou conseguir un obxectivo, parcial ou total (fin do xogo).
-
Exemplo:
-
Xogando ao Trivial conquistou as seis cores.
Xogo programado, reto superado
5. Se queres gañar, terás que xogar
Cando programar se converte en xogar
Agora que xa programastes todas as probas do xogo Sensa6 e as xuntastes en cada controladora en forma dunha aplicación, chegou o momento de xogar entre todos e todas. Prestade atención ás explicacións e regras do xogo para que as entendades ben e non vos perdades. Máis abaixo poderedes descargar o taboleiro e as fichas.
Lectura facilitada
Agora chega o momento de probar o xogo.
Prestade atención ás explicacións e ás regras.
Máis abaixo poderedes descargar o taboleiro e as fichas.
Audio
Obxectivo
O obxectivo é chegar ao centro do taboleiro e conseguir o superar o maior número de probas, é dicir, conquistar o maior número de cores.
.png "Taboleiro do xogo")
Hai 6 casas de cor, as cores primarias RGB e as secundarias CMY:
R – Vermello
G – Verde
B – Azul
C – Ciano
M – Maxenta
Y – Amarelo
Cada cor corresponde a unha proba cun sensor diferente das controladoras Adafruit ou micro:bit.
Material
Cada grupo dispón do seguinte material:
- Unha ficha para xogar onde se indicarán as casas gañadas. Cada vez que superedes unha casa, riscaredes o cadrado correspondente da ficha.
- Unha controladora programada por outro grupo, que virá acompañada da súa folla de instrucións.
- Un dado.
Como xogar
- Comeza o grupo que consiga a puntuación máis alta no dado.
- O grupo avanza ata a seguinte casa libre da súa rama.
- O grupo comproba a cor da casa.
- A persoa participante activa a proba correspondente. Para activar a proba, hai que premer o botón indicado e colocar o interruptor na posición correcta.
| Cor da casa | Combinación para activar a proba |
|---|---|
| R | Botón A + interruptor en OFF |
| G | Botón B + interruptor en ON |
| B | Botón A + B + interruptor en OFF |
| C | Botón A + interruptor en ON |
| M | Botón B + interruptor en OFF |
| Y | Botón A + B + interruptor en ON |
- O grupo le as instrucións da ficha de xogo.
- Realízase a proba correspondente.
Superar a proba
Se supera a proba:
- Conquista esa cor (ríscaa na ficha).
- Avanza unha casa.
- Pasa a quenda ao seguinte grupo en orde contraria ás agullas do reloxo.
Se non supera a proba:
.png "Rotación (cREAgal)")
- Non conquista a cor.
- Avanza igual unha casa.
- As controladoras rotan no sentido das agullas do reloxo.
- Pasa a quenda ao seguinte grupo en orde contraria ás agullas do reloxo.
Final
Final do xogo
- O xogo remata cando todos os grupos chegan ao centro.
- Gaña quen teña máis cores conquistadas.
En caso de empate
A persoa docente ten unha batería de preguntas. Fará preguntas aos grupos empatados ata desempatar.
Audio
O taboleiro, as fichas e o dado
Descarga aquí o taboleiro, as fichas e o dado do xogo.
Rúbrica de coavaliación
Despois de xogar e experimentar os programas de cada equipo, avalía o resultado con esta rúbrica, valorando cada ítem cunha das tres opcións posibles.
| Nivel Máster | Nivel Pro | Nivel Novato/a | |
|---|---|---|---|
| Funcionamento técnico | Todas as probas funcionan perfectamente e non presentan fallos. (2,5) | A maioría das probas funcionan, aínda que hai algún erro puntual. (1,5) | As probas non funcionan ou a controladora bloquéase a miúdo. (0,50) |
| Orixinalidade e deseño | O proxecto é moi creativo e utiliza os sensores de xeito innovador. (2,5) | Engadiron algún elemento propio ou modificaron a idea base con éxito. (1,5) | O proxecto é moi simple ou limita a copiar o visto na aula. (0,50) |
| Facilidade de uso | A placa e as instrucións guían ao usuario de forma clara (mensaxes LED, sons ou iconas). (2,5) | Enténdese o funcionamento básico, pero falta algunha indicación. (1,5) | Non se entende ben como interactuar coa placa ou que botóns premer. (0,50) |
| Nivel de dificultade | O nivel das probas é axeitado, non son nin demasiado fáciles nin moi complicadas. (2,5) | Algunhas probas son moi sinxelas ou imposibles de acadar. (1,5) | A maioría das probas ou son moi doadas ou son imposibles de acadar. (0,50) |
- Actividade
- Nome
- Data
- Puntuación
- Notas
- Reiniciar
- Imprimir
- Aplicar
- Nova xanela
O que aprendiches
Ao longo deste REA traballaches en grupo para desenvolver un conxunto de programas e implementalos nunha controladora co obxectivo de completar un xogo tipo party game chamado Sensa6.
Durante o proceso coñeciches os sensores e actuadores das controladoras micro:bit e Adafruit PCE e aprendiches a programar con elas. Repasaches as estruturas básicas dun programa e as estruturas de control.
Tamén aprendiches a utilizar datos procedentes dos sensores e a traballar con distintos tipos de variables: numéricas (luz, temperatura, son, inclinación ou aceleración), lóxicas, de texto e listas.
Con estes coñecementos, creaches seis programas diferentes para unha das controladoras e fuches capaz de integralos nunha aplicación sinxela para o xogo, seleccionando as probas cos botóns da placa.
Finalmente, completaches o party game Sensa6, xunto cos teus compañeiros e compañeiras, para a aula de Educación Dixital.
Agora xa podes dicir “xogo programado, reto superado”.
A continuación tes un resumo visual do proceso con todo o que aprendiches e fixeches ao longo desta aventura de programar para xogar. Preme na imaxe para exploralo con máis detalle.
Preme para descargar a infografía en PDF.
Lectura facilitada
Nesta unidade didáctica traballaches en grupo.
Fixeches programas e puxéchelos nunha controladora.
Ao final, construíches co teu grupo o xogo Sensa6 para a aula.
Agora xa podes dicir “xogo programado, reto superado”.
A continuación tes un resumo visual do proceso.
Preme na imaxe para vela con máis detalle.
Audio
Momento de reflexión
Ao longo desta aventura programaches o taboleiro dun xogo de mesa. Finalmente, tiveches ocasión de gozalo coas outras persoas da aula... Imaxinábaste que o mundo analóxico e o dixital podían convivir con tanta harmonía?
Reflexiona sobre esta e outras cuestións na fase 5 do teu diario de aprendizaxe, no que tamén tes unha táboa para facer unha autoavaliación do teu traballo ao longo do reto.
A continuación, comenta co resto de grupos as puntuacións deste apartado e fai un resumo das conclusións xerais.
Servirache de axuda para autoavaliarte, compartir información cos teus compañeiros e compañeiras de grupo e valorar o reto proposto.
Lectura facilitada
Programaches o taboleiro dun xogo de mesa.
Xogaches coas outras persoas da aula.
Viches como o mundo analóxico e o dixital poden convivir con harmonía.
Reflexiona sobre esta e outras cuestións na fase 5 do teu diario de aprendizaxe.
Alí terás que facer unha autoavaliación do teu traballo ao longo do reto.
Comenta co resto de grupos as puntuacións deste apartado.
Tamén fai un resumo das conclusións xerais.
Audio
Licenciado baixo a Licenza Creative Commons Atribución Non-comercial Compartir igual 4.0