Saltar navegación

4. Para o reto superar, cómpre traballar

 

Glosario

Depurada

Pictograma dunha depuradora de piscina

Definición:

Nun programa, dise dunha versión na que se detectaron erros e se corrixiron. No futuro poderían aparecer novos fallos que precisasen de máis depuración.

Exemplo:

O teu compañeiro de grupo depurou o teu código e agora o programa funciona ben.

Feedback

Imaxe cunha man axudando a outra e un interrogante

Definición:

En galego, retroalimentación. Adoita utilizarse en inglés para indicar un comentario ou avaliación dun proceso ou actividade, feito por alguén alleo ao grupo de traballo e que ten coma obxectivo corrixir os seus erros ou melloralo.

Exemplo:

Grazas ao feedback do profe puidemos mellorar o noso programa.

Programando e xogando fuches avanzando

Ao longo das fases anteriores fuches dando pasos cara ao reto:

  • Na fase 1 decatácheste do papel da programación nos xogos e descubriches o misterio do Sensa6.
  • Na fase 2 repasaches os bloques principais de programación e practicaches coas controladoras nas que programarás a aplicación para o xogo.
  • Na fase 3 traballaches con novos elementos de programación (variables e datos estruturados) e xa viches exemplos que podes empregar no Sensa6.

Agora chega o momento de poñer mans á obra: colaborar no deseño das probas do xogo.

Pero, en que consistirá exactamente o teu traballo? Segue lendo!

Lectura facilitada

Nas fases anteriores fuches avanzando cara ao reto.

  • Na fase 1 coñeciches a relación entre a programación e os xogos.
  • Na fase 1 tamén descubriches o misterio do Sensa6.
  • Na fase 2 repasaches os bloques principais de programación.
  • Na fase 3 traballaches con variables e datos estruturados.

Agora toca colaborar no deseño das probas do xogo Sensa6.

Segue lendo para saber cal será o teu traballo.

O reto

Taboleiro do xogo Sensa6. No centro ten un hexágono do que parten diferentes camiños con casas de cores. Ao remate de cada camiño hai un robot de diferente cor.

A clase vai completar o xogo de mesa Sensa6. O taboleiro está formado por varias ramas con casas e, en cada casa, o xogador terá que superar unha proba.

Cada proba realizarase empregando unha controladora programada previamente (Adafruit PCE ou micro:bit). Cando un xogador caia nunha casa, terá que executar a proba correspondente.

O reto do voso grupo será deseñar e programar unha aplicación para a vosa controladora. Esa aplicación deberá incluír todas as probas correspondentes ás casas dunha das ramas do taboleiro, de maneira que cada casa teña a súa propia proba.

Lectura facilitada

A clase vai completar o xogo Sensa6.

O taboleiro ten varias ramas.

Cada rama ten varias casas.

En cada casa hai unha proba.

Cando un xogador cae nunha casa, ten que facer a proba.

O reto do grupo é deseñar e programar unha aplicación.

Esa aplicación cargarase nunha controladora.

A aplicación debe incluír todas as probas dunha rama do taboleiro.

A continuación, tes o taboleiro do Sensa6:

Taboleiro do xogo Sensa6. No centro ten un hexágono do que parten diferentes camiños con casas de cores. Ao remate de cada camiño hai un robot de diferente cor.

Que versión da aplicación publicarás?

Máquina dun videoxogo de carreiras dos anos 80

Os programas, as aplicacións e os videoxogos non se publican directamente na súa versión definitiva. Normalmente publícanse primeiro versións incompletas ou con erros para que as persoas usuarias iniciais (chamadas testers) poidan revisalas e comentalas. A partir desas probas, os programas vanse mellorando ata chegar á versión final, que non sempre está completamente libre de erros (chamados bugs en programación).

O profesorado vai empregar a terminoloxía asociada ás versións dos programas para avaliar o voso traballo. Podes velo máis abaixo, na rúbrica do reto.

  • Versión alpha: unha versión insuficiente, con moitos erros.
  • Versión beta: unha versión aceptable para difundir, pero que aínda pode ter erros.
  • Release candidate ou RC (versión candidata): unha versión xa bastante depurada, candidata a converterse na versión final.
  • Stable version (versión estable): unha versión que pode darse por boa e estable, aínda que non perfecta.

Lectura facilitada

Os programas e os videoxogos non saen perfectos desde o principio.

Primeiro publícanse versións con erros ou incompletas.

Algunhas persoas proban esas versións.

Esas persoas chámanse testers.

Coas súas probas, o programa vai mellorando.

Os erros tamén se chaman bugs.

O profesorado usará os seguintes nomes para avaliar o voso traballo.

  • Versión alpha: ten moitos erros.
  • Versión beta: xa se pode probar, pero pode ter erros.
  • Release Candidate: xa está bastante mellorada e pode chegar a ser a versión final.
  • Stable version: é unha versión boa e estable.

Rúbrica: Versión do programa

A continuación tedes a rúbrica de avaliación do reto. Prestade atención aos diferentes criterios para axustarvos ben aos requisitos solicitados á hora de publicar a vosa aplicación.

Rúbrica de avaliación dos programas do reto
 "Stable version""Release candidate""Versión beta""Versión alpha"
Lóxica e algoritmosCódigo optimizado. Uso avanzado de variables ou listas. (2)Lóxica sólida. Uso correcto de bucles e condicionais. (1,5)Funciona, pero ten "bugs" (erros). Estrutura de bloques pouco eficiente. (0,75)O código rompe (falla) ou non cumpre a función. Lóxica moi desordenada. (0)
Interacción coa controladoraInteracción avanzada: uso dos sensores e actuadores con precisión total. (2)Interacción correcta: aínda que un ou dous sensores non funcionen con precisión total, o programa responde ben. (1,5)Resposta básica: acende luces ou soa pero de xeito moi simple ou con pouca precisión. (0,75)Non recoñece algúns dos sensores ou os actuadores non responden. (0)
UX (Interface de usuario)Experiencia de "App" real. "Feedback" visual/sonoro claro e estético. (2)Interface intuitiva. Os NeoPíxeles, a pantalla LED ou o son guían ben a persoa usuaria. (1,5)Interface rudimentaria. Hai que adiviñar que botón premer ou que facer. (0,75)A persoa usuaria non sabe como interactuar coa placa. Sen "feedback". (0)
Documentación e ordeDocumentación técnica impecable. Código modular (bloques personalizados). (2)Código limpo e ben comentado. Organizado por funcións. (1,5)Programas agrupados, pero sen etiquetas (comentarios) que faciliten a lectura. (0,75)Bloques espallados sen orde. Sen comentarios nin explicacións. (0)
Traballo en equipoEquipo de desenvolvemento de alto rendemento. Resolución autónoma sen apoio docente. (2)Colaboración eficaz. Todas as persoas entenden como funciona o código fonte. (1,5)Reparto de tarefas, pero falta comunicación técnica entre os membros. (0,75)Sen coordinación. O desenvolvemento foi individual e desintegrado. (0)

Elaboración propia (proxecto cREAgal). Rúbrica de avaliación dos programas do reto (CC BY-NC-SA)

  • Actividade
  • Nome
  • Data
  • Puntuación
  • Notas
  • Reiniciar
  • Imprimir
  • Aplicar
  • Nova xanela

Feito con eXeLearning (Nova xanela)