Ao compartir recursos e creacións o ser humano foi capaz de construír e espallar coñecemento de forma colaborativa e participativa. Agora que xa publicastes a vosa presentación é o momento de coñecer as presentacións dos outros grupos, descubrir e aprender novos coñecementos e tamén facer unha valoración construtiva dela.

Tede en conta o seguinte:

• Todas as presentacións teñen que ter comentarios dalgún membro doutro grupo.
• Dentro de cada grupo, faredes un repartimento equitativo para cubrilas todas. Por exemplo, se hai 9 grupos e sodes tres, cada integrante do voso equipo terá que comentar e valorar tres entradas de Board/Taboleiro.

Para visualizar as presentacións, abre o Board/Taboleiro no que fixestes as publicacións, localiza o eido e preme sobre a publicación que fixeron os demais estudantes. Na nova ventá poderás descargar o ficheiro comprimido que contén a presentación. Crea un cartafol dentro do cartafol do proxecto que teña por nome o eido que vas visualizar e garda este ficheiro comprimido dentro do cartafol. A continuación, descomprime o ficheiro comprimido e, no novo cartafol, localiza a presentación e visualízaa.

Ao rematar, debes engadir un comentario construtivo e respectuoso sobre a presentación que acabas de visualizar. Para facer este comentario, na mesma ventá onde descargaches a presentación, preme sobre "Add a comment" e a continuación escribe o teu comentario. Este comentario debes asinalo co teu nome e apelidos na última liña. Para rematar preme en "Add comment" para engadir o comentario. 

Recorda que a persoa docente poderá avaliar os teus comentarios nas presentacións do resto de compañeiros/as. Sé respectuoso e segue os consellos e normas da netiqueta que traballaches no apartado 3.4 Compartindo na Rede.