Podemos definir a condición física como o conxunto de factores que permiten que o corpo humano funcione axeitadamente e sexa quen de soportar e levar a cabo as tarefas básicas da súa vida cotiá.

Para iso, é preciso que haxa unha correcta coordinación entre os diversos sistemas do corpo humano e un bo desenvolvemento de todos eses factores que van estar implicados, evitando grandes diferenzas no grao de preparación de cada un deles.

Unha máquina ben preparada será aquela na que todas as súas pezas funcionen axeitadamente e teñan características similares, se non, o seu nivel virá marcado polas limitacións das pezas de menor calidade, ou o que é peor, non funcionará.

No caso do corpo humano, a situación é moi similar. De nada vale un desenvolvemento extremo dalgúns factores se outros, que non están ao mesmo nivel, van facer que os diversos compoñentes do corpo non rendan igual ou, o que é peor, provoquen desaxuntes que orixinen descompensacións ou lesións de diversa gravidade.

É por iso polo que resulta fundamental coñecer eses compoñentes que conforman a condición física, traballar axeitadamente cada un deles e así mellorar o rendemento xeral de todo o corpo, co fin de mantelo nunhas condicións óptimas de saúde que nos permitan satisfacer as necesidades da vida cotiá, a vida deportiva ou simplemente o paso dos anos, retrasando ao máximo as consecuencias do envellecemento.

A condición física é o estado físico que ten unha persoa, é dicir, o nivel que presenta ese individuo no funcionamento do seu corpo. Así unha persoa que teña unha boa condición física será quen de realizar as diferentes actividades da súa vida cotiá ou deportiva con vigor e eficacia, mentres que alguén que teña unha mala condición física non poderá realizalas ou sentirá moito cansanzo e perda de eficacia.
Acadar este óptimo estado pasa por coidar ao corpo mediante unha boa alimentación, descanso axeitado e un adestramento dos diferentes apartados que o forman.

A alimentación é esencial, pois é o punto de partida para que o corpo teña enerxía e demais substancias para funcionar axeitadamente. Deberá ser san e equilibrada tanto en cantidade como en variedade, e respectar as proporcións dos diferentes tipos de alimentos.

O descanso axeitado acádase durmindo un mínimo de 8 horas diarias, non saturando ao corpo de actividades e tensión, e mantendo un ritmo de vida relaxado e con certas rutinas.

O adestramento ideal é aquel que nos permite ter o corpo preparado para as actividades que debemos afrontar, polo que debería ser algo personalizado, pero en calquera caso, debe incluir traballo equilibrado das catro capacidades físicas básicas, que son: forza, velocidade, flexibilidade e resistencia. Calquera desequilibrio nalgunha delas pode causar lesións ou perda de eficacia, polo que é fundamental un traballo conxunto de todas elas.

É a capacidade resultante do conxunto de contraccións musculares que permiten opoñerse ou vencer unha resistencia. É fundamental na vida cotiá e no deporte, e un adestramento correcto permite a súa mellora de xeito moi importante. O exemplo da foto é unha melé de rugby, onde os equipos empurran para tentar avanzar e recoller o balón do medio.

É a capacidade de realizar un movemento ou percorrer unha distancia no menor tempo posible. Depende dalgúns factores biolóxicos (idade, sexo, herdanza), nivel de adestramento, número e tipo de segmentos corporais implicados, grao de quecemento e nivel de concentración, etc.
Os humanos temos o noso teito de velocidade correndo aproximadamente nos 36 Km/h, mentras que outros animais como o guepardo poden acadar os 120 Km/h.

A velocidade

Como vimos anteriormente, existen tres tipos de velocidade, polo que o tipo de traballo será moi diferente dependendo do que queiramos mellorar:

Velocidade de reacción.

Velocidade segmentaria.

Velocidade de desprazamento.

É a capacidade de realizar movementos coa máxima amplitude, con facilidade e soltura. É a única capacidade física involutiva, é dicir, vai minguando dende que nacemos, polo que é moi importante traballala para evitar acurtamentos musculares e rixidez nas articulacións que nos impidan levar a cabo actividades básicas na nosa vida cotiá. Exemplos de actividades onde se precisa certa flexibilidade son realizar un espagat, pasar un valo ou rañar as costas.

É a capacidade que ten o organismo para soportar esforzos prolongados ou intensos cando hai alta participación do aparato cardiorespiratorio, é dicir, deben estar implicados grandes grupos musculares de xeito que todo o corpo estea activado. Tamén fai referencia á capacidade que ten o organismo para recuperarse despois deses esforzos. Exemplos desta capacidade poden ser correr, nadar, andar en bicicleta, etc. sempre e cando se leven a cabo durante un tempo prolongado.

A resistencia