Saltar navegación

Galego

Que conmemoramos? / Marzo, Semana da Prensa

Xornais
    Pexels, Bundle, CC0

Desde o ano 1989 os centros de ensino galegos celebramos a Semana da Prensa. Nestas datas, os xornais convértense en aliados educativos que nos achegan a realidade, fomentan a nosa capacidade de lectura crítica e ofrécennos a análise dos temas de actualidade máis candentes.

Cando falamos de prensa estámonos a referir ao conxunto de publicacións periódicas, en papel ou dixitais, que se editan coa finalidade de ofrecer ao público información e opinión sobre diferentes ámbitos de interese: a política, o deporte, a cultura, a economía... mesmo o humor.

Entre as publicacións impresas, os xornais ou diarios ocupan un lugar destacado. Son medios de comunicación próximos a nós, que temos nas nosas mans ou consultamos en internet acotío, pero... que sabemos realmente deles?

Nesta unidade propoñémosvos un achegamento á súa historia e ás súas características. Quen sabe se no futuro non seremos xornalistas de sona mundial!

Imos aló!

Cal foi o primeiro xornal do mundo?

No 1605 publícase en Estrasburgo Colección de todas as noticias distinguidas e memorables, considerada a primeira publicación informativa diaria impresa. Estaba redactada en alemán e da súa coordinación encargouse Johann Carolus, quen se converteu no primeiro editor recoñecido.

Quen foi a primeira xornalista?

Trátase dun dato difícil de comprobar. Moitas das mulleres que escribiron nos xornais facíano baixo pseudónimos que ocultaban a súa identidade para así librarse dos impedimentos machistas que infravaloraban ou mesmo prohibían o seu traballo. A miúdo dáse o nome da americana Margaret Fuller (1810-1850) como o da primeira xornalista profesional. 

Que xéneros xornalísticos existen?

Para clasificar os xéneros xornalísticos pártese da diferenza entre información (obxectiva) e opinión (subxectiva e valorativa). Neste esquema podedes ver os principais.

Que é o cuarto poder?

Dise que quen ten a información ten o poder, ou o que é o mesmo, quen manexe a información pode manipular o comportamento e o pensamento da sociedade para que esta actúe conforme aos intereses dese poder.

Xa sabedes polas clases de Historia cales son os tres poderes. Se pensades un pouco, os medios de comunicación son o cuarto poder. Do voso esforzo por estardes informad@s, dependerá que sexades persoas críticas ou manipuladas.

É libre a prensa?

No 1993, a UNESCO proclamou o 3 de maio como o Día Mundial da Liberdade de Prensa. Con esta conmemoración preténdese fomentar a independencia da prensa, ademais de render homenaxe ás mulleres e homes xornalistas que sofren ataques ou perden a vida no exercicio da súa profesión. A simple existencia da data fálanos de que non sempre a prensa é tan libre e independente como debería.

 

Imos aló!

ACTIVIDADE: Escribe o nome do tipo de texto xornalístico debaixo de cada fragmento. 

EDITORIAL - ENTREVISTA - CRÓNICA - REPORTAXE - CARTA AO XORNAL -

ARTIGO DE OPINIÓN -CRÍTICA - NOTICIA

Xornalista: Que é a moda para ti?

Ana Locking: Non entendo a moda sen poesía, sen un concepto ou historia sobre a que realizar cada colección. Para min é unha forma de expresión, unha maneira de tratar aqueles temas que me obsesionan, seducen e/ou preocupan.
Achegarlle aos lectores e lectoras información veraz, imparcial e rigorosa é un dos obxectivos do noso diario desde os seus inicios, hai xa máis dun século. Agora, na era dixital, mantemos ese compromiso. Onte, a última hora da tarde, unha ciclista foi atropelada por un vehículo na estrada N-555 ao seu paso pola parroquia redondelá de Negros. A vítima, que non sufriu danos de gravidade, foi trasladada a un centro sanitario. A condutora do automóbil deu negativo na proba de alcolemia. Mazinger Z: Infinity logrou situarse entre os filmes máis vistos nas dúas últimas semanas de xaneiro. A chegada ás pantallas en 3D deste robot de máis de 45 anos engancha a vellos fans e ás novas xeracións. O seu director, Go Nagai, mestura con habelencia unha fórmula de éxito: batallas entre robots e sentimentalismo xaponés.
Son lectora do seu xornal desde que era pequena, cando meus pais o mercaban acotío para logo lelo con calma tras o xantar. Sei que, coma min, son moitas as persoas que usan este medio de comunicación para manterse informadas e é por isto que escollo esta sección para dar a miña opinión sobre o recentemente celebrado Campionato de caza do raposo. Mais... cal é realmente a situación da escola pública? Alguén pensa que pode competir en pé de igualdade cunha escola concertada -subvencionada cos cartos de todos nós, iso si- á que se lle permite rexeitar alumnado que non lle interesa? Os feitos narrados desde este lado do mundo poden resultar alleos para unha persoa europea, afeita a moverse nun ambiente social urbano, en moitas ocasións deshumanizado pola vertixe das grandes cidades. En África, nas aldeas africanas, os ritmos son máis lentos e as relacións humanas máis intensas e necesarias. A violencia de xénero continúa a ser un dos problemas máis graves da nosa sociedade, mais semella que só se toma conciencia del unha semana ao ano, cando se celebra o 25 de novembro. Neste número pretendemos analizar en profundidade cales son as causas que o orixinan e cales as posibles solucións, ofrecendo os datos necesarios que nos permitan situar este mal na súa verdadeira magnitude.


Habilitar JavaScript