☰

Como a vida mesma

Conectad@s?

Dúas actividades iniciais xunto coa orientación do proxecto.

Actividade

1. Na historia recente

Este vídeo da multitudinaria manifestación de Nunca Máis, en decembro de 2002, pode considerarse unha breve crónica audiovisual.
- Que nos permite afirmar que ese fragmento é unha crónica?
- Como soen recoller as noticias unha manifestación?
- Por que unha das consignas será "Televisión, manipulación!"?
- A que se refire Manuel Rivas con "O máis precioso orto da creación, velaí o tedes, en permanente ameaza, convertido nun vertedoiro de velenos"? Que figura literaria emprega ao expresarse así?

Apoios

Vídeo e transcrición


(Berros) Nunca máis! Aquí está, aquí se ve, Galiza en pé! Televisión, manipulación! Mareas negras, nunca máis!
(Intervención de Manuel Rivas) O máis precioso orto da creación, velaí o tedes, en permanente ameaza, convertido nun vertedoiro de velenos, machacado pola cobiza duns e o desleixo e o abandono doutros. Convocados aquí dunha maneira libre e unitaria, conservade ese tesouro; libre e unitaria en marea cívica fronte a marea negra do Prestige, e na crise e na emerxencia en que Galicia está asolagada, esiximos a declaración de Galicia como zona catastrófica por parte do Estado e da Comunidade Europea.


Actividade

2. Voz en off

A partir das imaxes do vídeo anterior, escribide individualmente o texto que podería acompañalas. Os datos do contexto son:

- Data: 1/12/2002.
- Lugar: Santiago de Compostela
- Asistencia: 200.000 persoas.
- Convocatoria: Plataforma cidadá Nunca Máis.
- Motivos: fundamentalmente a xestión política do afundimento do petroleiro Prestige e a falta de medios para enfrontar a marea negra.


Imaxe de Stéphane M. Grueso, CC BY-SA 3.0, vía Wikimedia Commons (https://upload.wikimedia.org/wikipedia/commons/7/73/Historias_del_Chapapote_08.jpg)
Plan

Acordando o labor

Revisamos o plan proposto e acordamos como desenvolvelo.

Organizade estes criterios de avaliación fundamentais segundo o valor que lles outorgades. Podedes, individualmente, numeralos.

- Comprende o sentido global e identifica a intención comunicativa e a estrutura de textos orais propios dos medios de comunicación audiovisual.
- Interpreta textos orais e traslada a información relevante a esquemas ou resumos.
- Produce, en soporte impreso ou dixital, textos xornalísticos.
- Usa as TIC para organizar os contidos, mellorar a presentación e facilitar a corrección dos textos escritos.
- Recoñece e explica nos textos as funcións sintácticas oracionais e diferencia os elementos que as desempeñan.
- Comprende e identifica as características da literatura galega da Idade Moderna e do Rexurdimento.
- Selecciona, seguindo criterios razoados, textos representativos da literatura galega para a súa lectura.
- Comenta, de forma guiada, textos de obras da Literatura galega, sinala os seus trazos característicos e relaciónaos co contexto.
- Compara textos literarios dunha mesma época ou período ou de diferentes épocas e períodos atendendo aos seus principais contidos e trazos en relación co contexto.
- Participa activamente nas interaccións, respecta as regras, manifesta as súas opinións e atende as dos demais.
- Avalía atinadamente as intervencións propias e alleas.
- Respecta as quendas de palabra, escoita activamente os demais e usa fórmulas de saúdo e despedida.
- Colabora co grupo e interésase por avanzar.
- Participa na procura e tratamento da información e sabe manexala.
- Resolve con acerto as actividades de análise e reflexión lingüística propostas.
- Contribúe na planificación dos textos e na súa mellora.
- Coavalía con criterio e autoavalíase.

Así mesmo, decidide de que xeito compoñer o xornal ou revista que ha conter as vosas crónicas que aproximan momentos da historia ao público. E tamén onde e como se pode difundir esa publicación. Ou sexa:
· A que público vos interesa dirixirvos fundamentalmente?
· As crónicas formarán parte doutra publicación ou constituirán unha específica? Nese caso, como pode titularse?
· Os textos organizaranse cronoloxicamente?
· Será unha revista dixital ou mellor en papel?
· No segundo caso, comporase manualmente con follas impresas? No primeiro, maquetarase nun programa de ordenador ou montarase nunha aplicación da rede ou publicarase nun blogue ou ben con etiquetas nunha rede social? · Con que medios podemos contar para difundila?
· En que lugares / espazos dixitais conviña intervir?


Inicio

Inicio.


Seguinte

Situámonos.