XEOGRAFÍA DE GALICIA

Zonas de relevo

ZONAS DE CHAIRA
As terras chás ou chairas son zonas planas que están situadas a maior ou menor altitude. Polo xeral atópanse en terras do interior.
Podemos atopar estas terras en:

-
Meseta de Lugo. Localízase no interior de Galicia; unha das chairas máis extensas. A súa parte norte adoita chamarse a Terra Chá.

-
Depresións. As depresións son terras chás que están por baixo do nivel do mar. No interior salientan as de Monforte, Maceda, A Limia ou Sarria. Preto do litoral atópase a gran depresión Tui-Padrón.

-
Chairas litorais. De menor altitude que as chairas do interior; preto da costa, están as da Mariña Lucense ou a de Bergantiños.
A vida nas chairas é máis doada que nas zonas montañosas porque o clima é máis suave. A maioría dos seus habitantes adícanse á agricultura e á gandaría; co gando vacún como máis común. Tamén se vive en aldeas e vilas, así como en cidades como Lugo e Ourense. Como nas zonas de montaña, o turismo rural tamén está en auxe nestes últimos anos.


Millares (Lugo).

ZONAS DE COSTA


A costa galega é moi recortada, con moitas praias, cabos, cantís, rías...

En Galicia, a zona de costa é a máis poboada, con vilas e cidades que teñen un gran número de habitantes como Vigo ou A Coruña.

Os habitantes das zonas de costa están ligados a actividades relacionadas co mar, como a pesca ou industrias relacionadas coa mesma.

O turismo é tamén moi importante nas zonas costeiras, grazas ás nosas praias, illas, parques naturais, beleza paisaxística, etc.


Ría de Arousa.

ZONAS DE MONTAÑA
O relevo de Galicia intégrase no Macizo Galaico.
As serras do Macizo Galaico conforman 3 grandes unidades de relevo:

-
Serras Setentrionais. As que están polo norte, con pouca altitude, salienta a Serra do Xistral.

-
Serras Centrais. Dividen a Galicia en dúas metades de norte a sur. Tamén son serras de pouca altitude como a Serra do Faro.

-
Serras Orientais e Sudorientais. Son as máis altas de Galicia. Ó norte do Sil están os Ancares e o Courel; ó sur atopamos a Serra de Queixa ou a Serra do Eixe cos picos máis altos de Galicia. O monte máis alto é Pena Trevinca, con 2.124 m.
As zonas de montaña están pouco poboadas debido ó accidentado do relevo e ó clima rigoroso. A xente vive en casas de campo ou aldeas e bota man da agricultura, a gandaría ou a explotación forestal e mineira. Algunhas vilas son centros de turismo rural.



Mondoñedo.