2.2.2 Esforzos que soportan os elementos das estruturas

Os elementos dunha estrutura deben soportar o seu propio peso e ademais outras forzas e cargas que actúan sobre eles. Isto orixina esforzos neles, que vemos de contado.

Tracción

Son forzas que tenden a estirar o elemento. Os tirantes están sempre sometidos a traccións nas estruturas, como nas pontes, guindastres, antenas…

Compresión

Son esforzos que tenden a comprimir o elemento. Os piares e columnas soportan esforzos de compresión

Cisalla ou cortadura

Prodúcese cando se aplican forzas perpendiculares ao elemento que tenden a rompelo. O puntos de apoio das trabes están sometidas a este tipo de esforzos.

Flexión

É unha combinación de tracción e compresión. No exemplo a parte superior do elemento estira (aumenta a lonxitude) polo esforzo de tracción, e a inferior diminúe polo esforzo de compresión. Un andel con libros está sometido a un esforzo de flexión.

Torsión

Os esforzos de torsión son os que fan retorcer a unha peza arredor do seu eixe central. Os eixes, as manivelas e os cegoñais están sometidos a esforzos de torsión.

Experiencia práctica

Coa serra de marquetaría constrúa a peza que amosa a figura con cortiza ou outro material flexible, e apóiea en dous soportes:
Exerza unha forza vertical cara a abaixo no centro da peza. Como cambia a separación entre os dentes superiores? Diminúe. Como cambia a distancia entre os dentes da parte inferior? Aumenta. A que tipo de esforzo estamos sometendo a peza? A unha flexión.
Pegue unha tira de papel na parte superior e outra na inferior (ve a figura) e repita a experiencia. Explique o que ocorre agora. A tira de papel inferior impide que os dentes inferiores se separen, daquela a peza enteira defórmase moito menos.