2.2 Conservación da masa nunha reacción química. Lei de Lavoisier

Sabemos que nunha reacción química os átomos que hai nas moléculas dos reactivos son os mesmos que hai nas moléculas dos produtos pero enlazados de xeito diferente. E como son os mesmos, teñen a mesma masa antes que despois da reacción. Dito doutro xeito, a masa dos reactivos ten que ser igual á masa dos produtos. Esta conservación da masa nas reaccións químicas descubriuna o químico francés Lavoisier (1743-1794, guillotinado), cando non se coñecía con certeza a existencia do átomo.

Ás veces parece que nas reaccións químicas non se conserva a masa. Por exemplo, se pesamos un papel antes e despois de queimalo, non pesa o mesmo. Cal é a explicación? Ocorre que a reacción química que se produce na combustión do papel é esta:

papel + O₂ (gas) → CO₂ (gas) + H₂O (gas) + cinzas

Se queimamos o papel nun frasco pechado e non deixamos escapar o dióxido de carbono CO₂ e a auga (gases) producidos, daquela habemos comprobar que os gramos antes e despois da combustión son os mesmos:



En resumo, a conservación da masa nunha reacción química é consecuencia da "conservación" dos átomos na reacción química.