2.5 Enerxía interna da Terra e formación de materiais terrestres

Os materiais que constitúen o noso planeta organízanse en substancias puras de composición constante, que chamamos minerais, que á súa vez, nalgúns casos, se agrupan para daren lugar ás rochas.

Algunhas destas rochas fórmanse no interior da Terra, polo que reciben o nome de endóxenas; son as magmáticas ou ígneas, e as metamórficas. Outras, pola contra, fórmanse no exterior da Terra e reciben o nome de rochas esóxenas, trátase das sedimentarias.