2.5 OpenOffice. Uso do dicionario e do corrector ortográfico

i	Ver Glosario: software libre

 

Neste caso, imos aprender unhas nocións básicas de como funciona o dicionario e corrector ortográfico do paquete ofimático OpenOffice (software libre), centrándonos na lingua galega ao longo de toda a actividade.

Os pasos que debe seguir en lingua castelá son idénticos que no galego; o único que cambia é que no programa, en vez de seleccionar como idioma o galego, deberá seleccionar o castelán.

O primeiro que debe facer é descargar e instalar o paquete ofimático OpenOffice (en caso de que non o teña xa no seu computador). Para isto, siga estas indicacións:

–      En internet, diríxase ao enderezo http://gl.openoffice.org/

–      Xa na páxina, vexa que aparece un recadro que leva por título “Descargar”, en embaixo “Calquera versión OpenOffice.org 3.3.0”. Pinche en “Descargar”; apareceranlle varias columnas. Seleccione na da esquerda o país (Galician) e o idioma (galego) e, dentro da opción de Windows (2ª columna), pinche “Download” (descargar).

–      A continuación, apareceralle unha nova ventá onde se lle pregunta se quere descargar ou gardar o ficheiro. É preferible descargar e indique en que directorio do seu computador o quere gardar (o proceso de descarga pode levar varios minutos, dependendo da velocidade da súa conexión a internet).

–      Cando finalice a descarga prema dúas veces co botón esquerdo do rato no ficheiro que descargou e siga os pasos que aparecen en pantalla para proceder á instalación do paquete ofimático.

–      Logo instalado, entre na aplicación OpenOffice e, na pantalla “Crear un novo documento”, seleccione a opción “Documento de texto”.

Diríxase no OpenOffice ao menú Ferramentas. Dentro del pinche na opción Ortografíae gramática. Apareceralle o seguinte cadro:

O manexo deste cadro é moi sinxelo. Os conceptos básicos que debe saber para facer unha boa corrección son os seguintes:

–      As palabras que o corrector sinala en vermello son as que probablemente necesiten ser corrixidas. Teña en conta que o corrector non é fiable ao cen por cen, polo que, despois de usalo, seguramente terá que revisar o texto manualmente.

–      Opción Idioma do texto: aquí debe pór o idioma en que está o texto que vai corrixir.

–      Opción Ignorar unha vez: con esta opción o corrector omitirá unha vez a corrección da palabra marcada en vermello, e deixaraa tal e como está.

–      Opción Ignorar todo: con esta opción o corrector omitirá ao longo de todo o documento a corrección da palabra marcada en vermello, e deixaraa tal e como está.

–      Opción Engadir: con esta opción pode engadir ao dicionario de galego do OpenOffice a palabra sinalada en vermello, no caso de que aínda sendo correcta a palabra, esta apareza como incorrecta.

–      No cadro Non consta no dicionario o pode escribir para facer as modificacións que considere necesarias. Logo de feitas prema na opción Cambiar ou Cambiar todo.

–      Opción Cambiar: cambia a palabra incorrecta en vermello pola que vostede seleccionou no menú Suxestións ou a que escribiu no recadro Non consta no dicionario.

–      Opción Cambiar todo: igual que a anterior pero o corrector, neste caso, non se limita a cambiar só a palabra sinalada nesa ocasión, senón todas as veces que esa mesma palabra se repite no documento.

Estas características que acabamos de ver son as básicas que debe saber manexar. Cando remate coa corrección debe pulsar o botón Pechar.